Në Tiranë u zhvillua sot takimi inaugurues i Komitetit të Përbashkët Konsultativ me Komitetin Ekonomik dhe Social të Bashkimit Europian, një hap i rëndësishëm në rrugën e integrimit europian të Shqipërisë.
Takimi inaugurues i EESC i Bashkimit Europian sjell bashkë përfaqësues të punëdhënësve, punëmarrësve dhe shoqërisë civile për të forcuar dialogun social dhe bashkëpunimin mes Shqipërisë dhe BE-së.
Presidenti i EESC, Oliver Ropke, gjatë fjalës së tij në takim nënvizoi se Shqipëria është vendi me performancën me të mirë të negociatave për anëtarësimin në BE.
“Ky është një ushtrim i përbashkët që e kemi kryer në muajt dhe në vitet e fundit dhe është vërtetë gjë e mirë që kemi vullnetin e përbashkët për të arritur diçka që është arritshme përmes këtij komuniteti konsultativ të përbashkët, i cili është një hap madhor drejt anëtarësimit të plotë në BE”, u shpreh Ropke.
“Që prej vizitës sonë të fundit në shtator ka pasur shumë zhvillime pozitive për shtetin tuaj, për marrëdhëniet e Shqipërisë me BE-në”, tha Ropke.
“Ky takim inaugurues ka të bëjë dhe me organizimin e shoqërisë civile dhe më këtë nënkuptojmë edhe punonjës socialë, sindikata, punëdhënës dhe organizata të tjera të shoqërisë civile. Komuniteti ka qenë mbështetës për procesin e zgjerimit të Ballkanit Perëndimor”, u shpreh Ropke.
Ropke nënvizoi se duhet të forcohen marrëdhëniet me shoqërinë civile.
“Jam optimist dhe shikoj me pozitivitet, kur shoh Shqipërinë, shikoj si është mjedisi i shoqërisë civile dhe sa i shkëlqyer është bashkëpunimi me qeverinë shqiptare. Mendoj se këto janë kushtet e shkëlqyera për të vazhduar me shtegun drejt BE-së”, tha Ropke.
Ropke nënvizoi se “ky komunitet nuk do të jetë një ent formal, por ky do të jetë një instrument i përfshirë që t’ju ndihmojë të jeni pjesë aktive e procesit të anëtarësimit”.
Ropke shtoi se “jemi besimplotë tek qeverisja shqiptare për t’i marrë parasysh rekomandimet që do të sjellë ky komunitet”.
Sipas presidentit të EESC ky proces do të jetë “një mundësi për të rritur mirëbesimin e autoriteteve nga njëra anë, dhe partnerët sociale dhe organizatat civile nga ana tjetër, si urë midis qytetarëve nga njëra anë, dhe autoriteteve nga ana tjetër”.
Ropke theksoi se Shqipëria është një nga vendet anëtare me performancë të shkëlqyer në rrugën e integrimit drejt BE-së. Presidenti i EESC uroi Shqipërisë që të mund të mbyllë negociatat në fund të 2027, në mënyrë që të bëhet anëtare më të drejta të plota në vitin 2030. Sipas Ropkes, viti 2027 për mbylljen e negociatave, është objektiv i arritshëm për Shqipërinë.
“Këto tri ditë të në Shqipëri ku Komuniteti ynë është i pranishëm, këto do të shënjojnë një gur kilometrik të rëndësishëm që tregon se Shqipëria, nuk dua të them vend pararendës, por është një nga anëtarët me performancën më të shkëlqyer në rrugën e anëtarësimit në BE-së në grupin e të Drejtave Themelore dhe Shtetit të së Drejtës, ky grup është këtu, ka misione për të gjitha vendet anëtarë dhe para pak kohësh vendosëm që ky grup të vizitojë të gjitha vendet kandidate, kemi qenë në Moldavi, në Serbi dhe tani jam këtu në Shqipëri.
“Shqipëria është vërtetë pranë, një nga vendet me performacën më të mirë të negociatave për anëtarësimin në BE dhe me gjithë zemër uroj që të arrini ambiciet që keni për të mbyllur deri në fund të 2027 gjithë kapitujt në mënyrë që të bëheni anëtarë me të drejta të plota deri në vitin 2030.
“Ky është një objektiv ambicioz, por me sinergjinë e autoriteteve shqiptare dhe shoqërisë civile është i arritshëm. Parimi i anëtarësimit me bazë të meritave, duhet të jemi të drejtë, dimë që në të kaluarën kemi lënë vende në listë pritje shumë të gjatë dhe mendoj nuk duhet të përsërisim më këtë temë, jam pozitiv se do të mund ta përmbyllim këtë proces siç është paraparë dhe siç e dëshironi dhe ju”, tha Ropke.
