Kampionati i Ligës së Parë të Maqedonisë së Veriut po futet në fazën më të nxehtë të sezonit. Java e 28-të, që zhvillohet të shtunën më 19 prill nga ora 16:00, premton emocione dhe duele me shumë peshë në të gjitha segmentet e tabelës, njofton Telegrafi.
Në Gostivar, skuadra kryesuese e kampionatit, Shkëndija, do të kërkojë të mbajë hapin drejt titullit kampion, kur të përballet me Besën që është në luftë për mbijetesë. Për kuqezinjtë e Tetovës, kjo është një ndeshje ku nuk lejohet asnjë gabim, sidomos duke parë se Sileksi po e ndjek nga afër me vetëm katër pikë më pak. Nga ana tjetër, Besa është e etur për pikë për të mbajtur gjallë shpresat për qëndrimin në elitë – çka e bën këtë duel jo vetëm të rëndësishëm, por edhe të paparashikueshëm.
Në stadiumin e Çairit, Shkupi, përballet me Sileksin, skuadrën që është kthyer në ndjekësin më të rrezikshëm të Shkëndijës. Sileksi do të synojë tri pikë të reja për të mbajtur presionin në garën për titull, por Shkupi, në anën tjetër, do të kërkojë të rikthehet te rezultatet pozitive për të ruajtur pozitat në mesin e tabelës.
Në një tjetër duel me nuanca evropiane, Struga Trim & Lum do të presë Gostivarin në një përballje direkte për një vend që siguron pjesëmarrje në Evropë. Struga rikthehet në shtëpi pas një fitoreje minimale, ndërsa Gostivari udhëton i motivuar pas suksesit ndaj Shkupit. Vetëm dy pikë i ndajnë këto skuadra, ndaj kjo sfidë pritet të jetë vendimtare për objektivat e tyre sezonale.
Në Ohër, një tjetër ndeshje me peshë të madhe – këtë herë në zonën e ftohtë të tabelës. Voska Sport ndodhet në një situatë të brishtë dhe ka nevojë urgjente për pikë, ndërsa në anën tjetër Vardari po lufton të mbetet larg rrezikut. Ky duel pritet të jetë i zjarrtë dhe me tension të lartë, pasi një gabim në këtë fazë të sezonit mund të kushtojë shumë.
Java e 28-të: Besa – Shkëndija, Struga – Gostivari, Shkupi – Sileksi, Voska Sport – Vardari, Rabotniçki – Pelisteri dhe Tikveshi – AP Brera.
