Ministri i Brendshëm Ervin Hoxha zhvilloi sot një vizitë, së bashku me kryeministrin britanik Keir Starmer, në Portin e Durrësit, për të parë nga afër masat konkrete e kontrollet kufitare në këtë port të rëndësishëm.
Ministri Hoxha shprehet se së bashku me Britaninë e Madhe është ndërtuar një histori suksesi, në menaxhimin e migracionit të paligjshëm.
“Fola me Kryeministrin Starmer mbi rezultatet e konferencës së fundit që u mbajt në Londër ku mora pjesë si përfaqësues i palës shqiptare. Me Anglinë kemi ndërtuar një bashkëpunim të fortë dhe efikas. Ndihma e tyre ka ndikuar në rritjen e kapaciteteve tona policore. Tashmë kemi oficerë të Policisë së Shtetit që punojnë në skuadra të përbashkëta hetimore me Policinë britanike”, thotë Hoxha në një postim në rrjetet sociale.
Ministri i Brendshëm pohoi se bashkë me kryeministrin britanik ndajnë bindjen se “rezultatet mbresëlënëse kundër migracionit të paligjshëm do t’i zgjerojmë edhe në fushën e luftës kundër krimit të organizuar”.
