Kryetari i Partisë Demokratike, Sali Berisha deklaroi sot se kompania postare ndërkombëtare DHL ka shkelur kontratën që kishte me KQZ-në për votën e diasporës dhe se nënkontraktori i saj bashkëpunoi ngushtë me Partinë Socialiste.
“Farsa elektorale 11 maj 2025 ka pasur një nga faqet më të shëmtuara, historitë më të turpshme, votën e diasporës apo qëndrimin kriminal të narkomazhorancës ndaj votës së diasporës”, tha Berisha në një konferencë për mediet.
Sipas tij, “kjo votë ka pësuar manipulimin më masiv, më të paskrupullt, më të hapur”.
“Ky mishmash, sipas të dhënave tona, nuk ka ndodhur vetëm në Greqi, por ka ndodhur edhe në Itali dhe ndonjë vend tjetër”, theksoi Berisha.
Berisha shtoi se, “për t’u realizuar ky mishmash, DHL me urdhër të qeverisë ka shkelur kontratën dhe ka kontraktuar nënkontraktorë të tjerë, të cilët kanë bashkëpunuar ngushtë me PS-në. Ndonëse kontrata parashikonte se asnjë lloj nënkontraktimi nuk mund të bëhej”.
“DHL u pranua nga ne për shkak të reputacionit të saj, por segmenti shqiptar i DHL-së funksionoi krejtësisht sipas urdhrave, porosive të qeverisë dhe të Edi Ramës. Zarfet, votat, nuk u mbushën nga qytetarët e regjistruar, por ato në mijëra, mijëra, mijëra prej tyre u plotësuan nga patronazhistët, të dërguar nga Tirana, nga punonjës apo ish-punonjës të ambasadave dhe solli një manipulim të dalë jashtë kontrolli”, tha më tej Berisha.
Berisha gjithashtu u shpreh se “e implikuar është edhe Posta Shqiptare”.
“Dora e zezë e Postës Shqiptare, është një nga faktorët e tjerë që u shtri mbi votën e diasporës. Ky është një proces i kriminalizuar në shkallën më të lartë, që kurrë nuk do njihet dhe nuk do pranohet”, tha Berisha.
Ai solli edhe disa shembuj. “Në Lezhë vota të numëruara janë 12.290, kurse të dërguara janë 11.872. Kjo sepse ata që kanë plotësuar zarfet, ata nuk kanë pasur të ndalur, kanë tejkaluar edhe këtë të dhënë.
Këtu në Dibër, nga 7 733 zarfe të numëruar, janë dërguar vetëm 7547 zarfe në total. Edhe këtu janë shtuar 200 zarfe për të ndihmuar partinë. Në Durrës janë shtuar 560 zarfe më shumë.
Në Fier, 27.191 zarfe janë numëruar, në fakt kanë qenë gjithsej 26.212, pra pothuajse 1 mijë zarfe më shumë. Në Kukës, 3003 zarfe, kanë gjithsej 2917 në total. Në Shkodër, janë numëruar 13.959 zarfe, kanë qenë gjithsej 13.533 zarfe në total. Në Tiranë, janë numëruar 43.773 zarfe nga 42.400 në total, pra 1300 më shumë”, tha Berisha.
“E shihni pra që nuk janë ngopur së futuri zarfe në kutitë që kanë ardhur, në postë, në magazinë apo kudo”, tha ai.
Berisha shtoi se “nesër do u paraqes listën e plotë të të gjitha dokumenteve të dhunuara barbarisht nga narkoshteti”.
