Presidenti i La Ligas, Javier Tebas, ka folur pozitivisht për ardhjen e mundshme të Xabi Alonsos si trajner i ardhshëm i Real Madridit, duke theksuar ndikimin që kjo do të kishte jo vetëm për klubin, por edhe për futbollin spanjoll në tërësi.
Duke folur gjatë një konferencë mbi kontrollin ekonomik dhe qëndrueshmërinë e mbajtur në stadiumin El Molinon në Gijon, Tebas iu përgjigj pyetjeve nga mediat dhe nuk e mbajti admirimin e tij për ish-lojtarin e kombëtares spanjolle.
“Real Madridi beson se është opsioni më i mirë për ta dhe jam i lumtur për Xabi Alonson”, ka thënë fillimisht Tebas.
“Jam i lumtur që ai po kthehet në futbollin spanjoll dhe po kthehet në një klub të madh – klubin e tij. Mendoj se është një veprim i shkëlqyer; klubet marrin vendimet e tyre”.
Tebas vazhdoi të theksonte rëndësinë më të gjerë për La Ligën rreth kthimit të talenteve të mëdhenj në Spanjë.
“Më pëlqen kur lojtarët dhe trajnerët më të mirë vijnë në ligën tonë – ata që janë numri një tani në Evropë dhe në botë”.
“Xabi Alonso është një prej tyre. Të fitosh një ligë me Bayer Leverkusen ndërsa garon me Bayern Munich nuk është një arritje e lehtë”, përfundoi i pari i La Ligës.
Alonso, i cili e udhëhoqi Bayer Leverkusenin drejt një titulli historik në Bundesligë, është lidhur fort me një rikthim në Santiago Bernabeu, në atë që do të ishte puna e tij e parë si trajner në La Liga.
