Deputeti i opozitës Enkeljed Alibeaj në Komisioni për Çështjet Ligjore, Administratën Publike dhe të Drejtat e Njeriut, ku u diskutua projektligji për “Për mbrojtjen e të dhënave personale”, kërkoi që ky projektligj të shtyhet për legjislaturën e ardhshme.
Sipas Alibeajt, ka pasur një dështim në procesin e konsultimeve, ndërkohë që ky projektligj vendos shumë kurthe për biznesin.
“Nuk është e vërtetë që është konsultuar. Po ndodh një seancë konsultimi me organizatat e biznesit shqiptar. Ata që janë përdoruesit më të shumtë dhe sensitive të këtij projektligji janë organizatat e bizneset. Ky projektligj ka dalë për konsultim për herë të parë në korrik 2022. Askush nuk është kujtuar më për të.
Më 16 tetor, të këtij viti janë njoftuar se Këshilli i Ministrave ka miratuar projektligjin. Organizatat e biznesit dhe shoqëria civile kanë kërkuar të konsultohen realisht me përmbajtjen e këtij projektligji, pasi e ndjejnë se është një projektligj shumë i rëndësishëm dhe vendos shumë kurthe për biznesin, kërkuan që ky projektligj mos të miratohet në këtë sesion. Ka një dështim tek procesi i konsultimit dhe ata janë organizata bizneseve që duan jo vetëm ta studiojnë, konsultojnë por edhe të sugjerojnë”, tha Alibeaj.
Alibeaj tha ky projektligj ka vendosur ndoshta rekordin më të zi në raportet midis shtetit dhe biznesit.
“Ka vendosur që gjobat eventuale që i vendosen biznesit nga autoritetet shkojnë deri në rangun e 20 milionë eurove. Ky projektligj parashikon kurrë më parë në këtë dynja gjoba 20 milionë euro për biznesin, për çfarë, për “mbrojtjen e të dhënave personale””, tha Alibeaj.
Alibeaj tha se me këtë projektligj, me këto gjoba komuniteti i biznesit futet nën darën e shantazhit të qeverisë.
“Kërkonin që të miratohet legjislaturën tjetër. Është e udhës që për një çështje kaq të rëndësishme ky parlament do të duhet ta ketë dinjitetin politik që këtë projektligj kaq të rëndësishëm ta spostojë për legjislaturën e ardhme. Do të garantonte që mos të përdorej si kamxhik shtesë ndaj biznesit”, tha Alibeaj.
Deputetja e Partisë Demokratike, Dhurata Çupi tha po ashtu se ligji është një instrument në dorë të qeverisë.
“Nuk mund të shqyrtojmë një ligj që është me regresiv se ligji që është sot në fuqi. Këtu nuk ka pasur asnjë masë duhet të mbahet përgjegjësi. Ky ligj është një instrument shtesë në dorën tuaj”, tha Çupi.
Nga ana tjetër deputetja socialiste, Ermonela Felaj tha se “kërkesa për ta kaluar në një sesion tjetër parlamentar është e pabazuar dhe e pambështetur.
Ndërsa kryetarja e komisionit Klotilda Bushka shtoi “Kuvendi në tërësi po bën konsultime, nuk e vendosim ne të tërhiqet projektligji, ne vendosim e miratojmë ose jo në këtë fazë që jemi”.
