Gjykata e Posaçme e Apelit ka hequr sekuestron për banesën e nënës së deputetes Monika Kryemadhi, ndërsa ka mbetur në fuqi vendimi për sekuestrimin e apartamentit të kësaj të fundit.
Në një prononcim për mediet para SPAK, Kryemadhi tha se do bëjë rekurs në Gjykatën e Lartë.
Kryemadhi e konsideron këtë proces gjyqësor ndaj saj, si “hakmarrje sa i përket inceneratorit të Tiranës”.
“Prokurori e pranoi që banesat ku unë banoj janë përfituar në mënyrë të ligjshme, gjyqtarja për mamanë time, e cila akuzohej se kishte marrë një kredi në 2010 ia liroi banesën e saj, ndërsa për mua vazhdon të jetë nën sekuestro. Do e apeloj, unë jam bashkëpunëtore në inceneratorin e Tiranës.
“Është hakmarrje, unë e kam marrë me shkëmbim apartamentin tim, një shtëpi në bllok është marrë me kredi. Gjyqtari vetëm lexoi vendim të shkurtuar, prokurorët ngritën arsyet e bashkëpunimit të mamasë sime me Ilir Metën për korrupsion, që nga videoja e Dritan Priftit ka bashkëpunuar për të blerë banesën. Do bëj rekurs në Gjykatë të Lartë”, u shpreh Kryemadhi.
E pyetur nga gazetarët nëse ka shanse që tanimë të zhvendoset tek nëna e saj, Fatimja, Kryemadhi tha se, “unë kam jetuar gjithmonë me mamanë time”.
