Mikel Arteta këmbëngul se ai ka shpresë për të fituar titullin e parë të Arsenalit në Ligën e Kampionëve pasi arriti në gjysmëfinale, teksa e ka vlerësuar lartë skuadrën e tij pas paraqitjeve me Real Madridin.
Arsenali fitoi dy ndeshjet çerekfinale ndaj Real Madridit duke e eliminuar me rezultat të përgjithshëm 5-1 për të kaluar në gjysmëfinalen e garës elitare.
“Natyrisht historia që kemi në këtë garë është kaq e shkurtër. Është hera e tretë në historinë tonë që ne kemi bërë atë që sapo kemi bërë. Kështu që ne duhet të ndërtojmë mbi këtë”, ka thënë fillimisht Arteta pas ndeshjes.
“Ne jemi vërtet të uritur, duam më shumë, është një ekip vërtet i ri që është shumë i vendosur dhe e gjithë kjo përvojë – duke përfshirë edhe mua – do të na ndihmojë shumë për të arritur diçka të madhe”.
“Ishte një nga netët më të mira të karrierës sime futbollistike, vërtet e veçantë. Kemi luajtur kundër ekipit me historinë më të madhe që ka qenë frymëzim për të gjithë ne në këtë garë. Pra, që të mund të fitojmë në këtë mënyrë, duhet të jemi vërtet krenarë për veten tonë”.
“Jam vërtet krenar sepse është vërtet e vështirë. Ishte hera ime e parë në vijën anësore këtu, kështu që nuk kisha përvojë më parë”.
“Pas dy ose tre minutash, kupton se gjithçka mund të ndodhë në këtë stadium. Duhet të jesh aty për ta kuptuar dhe menjëherë, nëse diçka nuk shkon, loja vazhdon dhe gjithçka mund të ndodhë”.
“Fatmirësisht, shumë gjëra shkuan për ne përveç Saka që humbi penalltinë, por, në përgjithësi, bëmë atë që duhej të bënim për të fituar ndeshjen”.
Arteta ka folur edhe për përballjen me Paris Saint-Germain në gjysmëfinale.
“E pashë ndeshjen e tyre, një tjetër lojë e çmendur. Çdo gjë mund të ndodhë në këtë garë. Ata janë një ekip i jashtëzakonshëm. Unë e njoh menaxherin e tyre shumë mirë. Le të kënaqemi sonte dhe të fillojmë të mendojmë edhe për atë”.
“Ne kemi përvojën, por ata janë një ekip tjetër tani. Ata janë në një ecuri të jashtëzakonshme për momentin. Por edhe për ne, ne treguam sonte se mund të konkurrojmë kundër çdo ekipi”, përfundoi trajneri i Arsenalit.
