Alex Yee ka fituar medaljen e pestë të artë të Britanisë së Madhe në Lojërat Olimpike ‘Paris 2024’ me një rikthim të jashtëzakonshëm në garën e triatlonit për meshkuj.
Yee, i cili fitoi garën e stafetave të përziera në ‘Tokio 2020’ së bashku me Jess Learmonth, Jonny Brownlee dhe Georgia Taylor-Brown, fitoi medaljen e tij të dytë të artë olimpike me një performancë mahnitëse në xhiron e fundit të garës së sotme të meshkujve në Paris.
26-vjeçari nga Londra arriti ta kalojë dhe ta lë mbrapa Hayden Wilde të Zelandës së Re, kur kishin mbetur 15 sekonda në xhiron e fundit.
Shikuesit mbetën të hutuar se si Yee kishte arritur të kthehej ndaj rivalit të tij kaq shpejt pa u kapur plotësisht nga kamerat televizive.
Yee, i cili fitoi medaljen e argjendtë në triatlon për meshkuj në Lojërat Olimpike 2020 në Tokio, u rrëzua përtokë pasi fitoi garën e sotme.
Më pas ai rifitoi qetësinë për të shtrënguar duart me Wilde, me dy atletët që ndanë një moment respekti në fund të garës rraskapitëse, e cila u shty nga e marta për shkak të niveleve të ndotjes në lumin Seine.
Menjëherë pas kësaj, Leo Bergere i Francës arriti të fitonte medaljen e bronztë për kënaqësinë e mbështetjes nga tifozët vendas në Paris.
