Shkup, 22 korrik – Kuvendi sot e filloi mbledhjen e 62-të plenare në të cilën në rend dite janë propozim i plotësuar i ndryshimeve dhe plotësimeve të Buxhetit për vitin 2025, Propozimi i llogarisë përmbyllëse të Buxhetit të Republikës së Maqedonisë së Veriut për vitin 2024 dhe Propozim ligji për ndryshim dhe plotësim të Ligjit për ekzekutim të Buxhetit të Republikës së Maqedonisë së Veriut për vitin 2025, me procedurë të shkurtuar.
Deputetët duhet të sjellin vendim për dërgimin e pjesëtarëve të Armatës së Republikës së Maqedonisë së Veriut për pjesëmarrje në operacionin ndërkombëtar të Organizatës së Kombeve të Bashkuara “UNIFIL”, në Republikën e Libanit, ndërsa duhet ta shqyrtojnë edhe Propozim ligjin për institucione për mësim të mesëm të bashkësive fetare, në lexim të parë.
Rendi i ditës në mbledhjen e 62-të është plotësuar me Propozimin e Ligjit për veprimtari inovative, zhvillim shkencoro-teknologjik dhe sipërmarrësi, me procedurë të shkurtuar si propozim i deputetëve nga shumica në pushtet, si dhe me vendim për shpallje të konkursit publik për drejtor të Agjencisë për mbrojtje të të dhënave personale.
Mbledhja filloi me vonesë prej një ore vonesë, sërish me kërkesë të deputetëve nga e Majta, sepse, sipas tyre, ende nuk kanë marrë informatë nga sekretari i përgjithshëm i Kuvendit për lartësinë e shpenzimeve të rrugës dhe qirasë që u është paguar disa deputetëve.
