Shkup, 27 mars – Fëmijët mësojnë në shkolla të sigurta. Opinioni dhe prindërit duhet të jenë të sigurt, nuk ka vend për panik dhe frikë. Paniku dhe frika e tyre ishin të arsyeshme, por fëmijët janë në duar të sigurta dhe garant për gjithë këtë jemi ne, tha sot kryetari i Bashkësisë së njësive të vetëqeverisjes lokale (BNJVL) dhe kryetar i Komunës së Kisella Vodës, Orce Georgievski.
Në periudhën e ardhshme, theksoi Georgievski, do të angazhohem që kontrollet e rregullta të bëhen të detyrueshme së paku një herë në vit, në përputhje me ligjin dhe të mos i lëmë vullnetit të mirë të kryetarit apo shërbimeve.
Georgievski tha se tani janë duke u bërë kontrolle të jashtëzakonshme inspektuese, duke theksuar se në Komunën e Kisella Vodës kontrolli i rregullt është bërë në fund të vitit të kaluar dhe ka dokumentacion të plotë se shkolla është sipas të gjitha standardeve dhe i plotëson të gjitha kërkesat.
“Si kryetar i BNJVL-së, por edhe si kryetar i komunës sime, dua t’u them qytetarëve tanë se fëmijët e tyre më të dashur dhe më të vegjël mësojnë në shkolla dhe çerdhe të sigurta. Gjithçka që është evidentuar si mangësi, nëse diku duhet ndërruar diçka për shkak të vjetërsimit, nëse ka lëshime si mos kryerja e kontrolleve të rregullta në një shkollë të caktuar, kjo nuk guxon të ndodhë në të ardhmen, do të hiqet me shpejtësi në periudhën e ardhshme nga autoritetet lokale në bashkëpunim me drejtorët e shkollave dhe shërbimet komunale”, tha Georgievski duke iu përgjigjur pyetjeve të gazetarëve pas vizitës së shkollës fillore “Partenija Zografski”.
