Një tjetër sezon ka kaluar dhe Arsenali e ka mbyllur pa trofe, përkundër se ishin në garë për ta fituar Ligën Premier deri në xhiron e fundit.
Në fund londinezët e mbyllën në pozitën e dytë 89 pikë, dy më pak se Manchester City që u shpall kampion i Anglisë.
Jesus ka shënuar vetëm katër gola dhe ka asistuar në pesë të tjerë në 27 ndeshje në Ligën Premier.
Ai e ka pranuar se ka pasur një sezon zhgënjyes, derisa ka thënë se vitin tjetër do të jenë sërish aty për të luftuar.
“Nuk është sezoni më i mirë për mua personalisht, gjërat nuk shkuan siç kisha planifikuar, por nuk mund të jem më krenar për ekipin ku jam pjesë”, shkroi Gabriel Jesus.
“Ky grup është i mahnitshëm dhe ne po e tregojmë atë sezon pas sezoni. Tani është koha për të pushuar dhe për t’u përgatitur për të qenë më të shëndetshëm sezonin e ardhshëm. Ne do të kthehemi më të fortë dhe të gatshëm për të”, ka thënë sulmuesi brazilian.
Megjithatë e ardhmja e tij te skuadra londineze nuk është e sigurt, pasi lojtari rrezikon të shitet nga Arsenali gjatë afatit kalimtar të verës.
