Interi ka kontaktuar Cesc Fabregasin, teksa e ardhmja e trajnerit Simone Inzaghi mbetet ende e paqartë.
Trajneri spanjoll është shfaqur si kandidati kryesor nëse ndodh ndonjë ndryshim në stolin zikaltër.
Sipas Corriere dello Sport, një takim vendimtar pritet të mbahet së shpejti mes Inzaghit dhe drejtuesve të klubit. Trajneri mund të largohet për shkak të interesit nga Arabia Saudite, ose të zgjedhë një vit pushim pas një sezoni intensiv.
Ndërkohë, Interi ka vepruar me shpejtësi duke kontaktuar Fabregasin drejtpërdrejt në orët e fundit. Edhe pse aktualisht ai është me pushime dhe i përkushtuar ndaj projektit të Comos, oferta e Interit shihet si një mundësi që ai po e konsideron seriozisht.
Emërimi i tij nuk do të jetë i thjeshtë. Fabregas është nën kontratë me Comon dhe ka lidhje të ngushta me pronarët e klubit, çka e bën largimin në këtë fazë mjaft të ndërlikuar.
Qëllimi i klubit është jo një rindërtim, por përmirësim brenda strukturës aktuale.
Profili i Fabregasit përputhet me kërkesat e klubit, një trajner i ri, ambicioz dhe me fleksibilitet taktik. Ai ka përdorur skemën me tre mbrojtës edhe kundër vetë Interit këtë sezon, duke treguar përshtatshmëri.
Vendimi i Inzaghit, që pritet këtë javë, do të jetë thelbësor për të përcaktuar nëse Interi do të nisë një epokë të re me Fabregasin në krye.
