Bogota, 25 shtator, argument.mk/ – Kolumbia ka ndërprerë zyrtarisht marrëdhëniet diplomatike me Iranin, një vendim që ishte marrë më 19 shtator dhe u bë publik sot nga Ministria e Jashtme kolumbiane.
Qeveria kolumbiane tha se vendimi lidhet me shqetësimet për sigurinë kombëtare dhe të hemisferës, si dhe me luftën kundër krimit ndërkombëtar.
Bogota përmendi ato që i cilësoi si lidhje të dyshuara të qeverisë iraniane me grupe terroriste dhe narkoterroriste.
Në arsyetimin e saj, Kolumbia përmendi gjithashtu shkeljet e të drejtave të njeriut në Iran, sulmet ndaj vendeve që nuk janë pjesë e konfliktit në Lindjen e Mesme, bllokimin e Ngushticës së Hormuzit dhe pengimin, sipas saj, të punës së Agjencisë Ndërkombëtare të Energjisë Atomike për verifikimin e programit bërthamor iranian.
Ministria e Jashtme kolumbiane tha se këto zhvillime kanë dëmtuar besimin e Bogotas ndaj qeverisë iraniane.
Megjithatë, ndërprerja e marrëdhënieve diplomatike nuk nënkupton ndërprerjen e marrëdhënieve konsullore.
Sipas autoriteteve kolumbiane, shërbimet konsullore do të vazhdojnë në përputhje me Konventat e Vjenës.
Në një vendim tjetër, Kolumbia e ka shpallur Gardën Revolucionare Islamike të Iranit (IRGC) organizatë terroriste dhe ka njoftuar masa më të forta kontrolli ndaj personave të lidhur me të.
