Shkup, 12 nëntor argument.mk/ – Drejtoria e të Ardhurave Publike (DAP) ka publikuar Listën më të re të borxhlinjve nr. 11/2026, në të cilën janë evidentuar gjithsej 5.200 debitorë tatimorë, me borxh neto të përgjithshëm për tatime dhe kontribute prej 13,784 miliardë denarësh, përkatësisht rreth 224 milionë euro.
Në listë përfshihen borxhet e maturuara deri më 31 korrik 2026, të cilat kanë mbetur të papaguara deri më 31 tetor 2026.
Të dhënat më të fundit të DAP-it tregojnë se një numër i konsiderueshëm i tatimpaguesve vazhdojnë të kenë detyrime të papaguara ndaj shtetit, ndërsa te disa prej debitorëve është evidentuar edhe rritje e mëtejshme e borxhit.
Në krye të listës janë tri kompani nga Shkupi. Borxhliu më i madh është kompania „Hant Osoj Trejd“, me borxh mbi 900 milionë denarë, përkatësisht rreth 14,87 milionë euro, tërësisht në bazë të Tatimit mbi Vlerën e Shtuar (TVSH).
Me një shumë të ngjashme detyrimesh të papaguara është edhe kompania shkupjane „Okitna Trejd Import-Eksport“ SHPKNJP, e regjistruar në Vizbeg. Ndër tri borxhlinjtë më të mëdhenj është edhe „Lisav Kompani“ nga Shkupi, e cila ka borxh 449 milionë denarë.
Sipas të dhënave të publikuara, te të tria kompanitë borxhi lidhet ekskluzivisht me TVSH-në e papaguar.
Kompania „HANT Osoj“ ka vetëm një të punësuar dhe është themeluar në vitin 2022.
Partia aktualisht në pushtet, VMRO-DPMNE, para dy vitesh, kur ishte në opozitë, pretendonte se kompania „Hant Osoj“ deri në fund të vitit 2022 kishte funksionuar me emrin „Hantonos“. Pronari i atëhershëm, Vase Panajotov, ia kishte shitur kompaninë një personi të quajtur Agim Imeri nga Kosova, i cili, sipas pretendimeve të partisë, kishte përfituar rimbursim të TVSH-së prej 12 milionë eurosh dhe më pas ishte zhdukur.
„Kompania HANTONOS është hapur në janar të vitit 2022 nga Vase Panajotov nga fshati Sekirnik i Strumicës, ndërsa më 25 nëntor 2022 i është shitur Agim Imerit nga Mitrovica e Kosovës, i cili ia ndryshon emrin në HANT OSOJ dhe e zhvendos selinë në Shkup. Kjo kompani e re, njësoj si AKTIKO/OKITNA, për një periudhë të shkurtër kryen tregti dhe importon mallra në vlerë prej 57 milionë eurosh, ndërsa askush nuk pyet se nga vijnë paratë. Për këtë aktivitet shfrytëzon rimbursim të TVSH-së prej mbi 10 milionë eurosh.
Kur në vitin 2023 vjen koha për pagesën e tatimit, DAP-i konstaton se kompania nuk paguan. Më pas, për të mos arritur ta gjejë pronarin, Ministria e Punëve të Brendshme njofton se personi Agim Imeri nga Mitrovica e Kosovës, të cilit i ishte shitur kompania, nuk kishte hyrë fare në Maqedoni gjatë periudhës kur pretendohet se e kishte blerë dhe kishte punuar me kompaninë.
DAP-i më pas konstaton se kompania nuk ka libra afaristë, nuk ka kontabilitet dhe ka borxh tatimor. Shuma që DAP-i kërkon aktualisht është 12 milionë e 226 mijë euro, pra pikërisht paratë e dhëna përmes rimbursimit të TVSH-së“, deklaroi atëherë zëdhënësi i VMRO-DPMNE-së, Naum Stoilkovski.
Tani, sipas artikullit, pushtetit duket se nuk i pengojnë rastet kur kompani të caktuara dyshohet se kryejnë keqpërdorime me rimbursimin e TVSH-së nga shteti.
Për keqpërdorime të ngjashme me rimbursimin e TVSH-së, VMRO-DPMNE kishte akuzuar edhe kompaninë „Okitna Trejd“, e cila në fund të vitit 2022 kishte kaluar nga pronarja e atëhershme Zule Karmzova në duart e Egzon Berishës nga Kosova, i cili, sipas pretendimeve të partisë, kishte përfituar rimbursim të TVSH-së prej 11 milionë eurosh.
Kompania „Dianita“ SHPKNJP nga Strumica është borxhliu i katërt më i madh, me detyrime prej 394 milionë denarësh ose pak më shumë se 6 milionë euro. Borxhi i saj është rritur për 16 milionë denarë vetëm brenda tre muajve.
Përmes kësaj kompanie, vitin e kaluar janë realizuar qarkullime në vlerë prej 182 milionë eurosh, përkatësisht 210 për qind më shumë të ardhura se një vit më parë, ndërsa njëkohësisht është paraqitur humbje prej pak më shumë se 700.000 eurosh.
Pronari i kompanisë është Dragi Mehanxhiski nga Strumica. Kompania disponon tri depo për tregti me shumicë të tekstilit, dy prej të cilave ndodhen në Kisella Vodë dhe një në Strumicë.
Deri më 7 korrik, „Dianita“ kishte qenë 511 ditë nën bllokadë nga DAP-i, nga ku deri në atë datë ishin dërguar 23 vendime për përmbarim, në vlerë prej 5,65 milionë eurosh.
Prokuroria për Ndjekjen e Krimit të Organizuar muajin e kaluar njoftoi se kjo kompani është e lidhur me rrjetin e kompanive të biznesmenit nga Strumica, Risto Kërmzov, të cilat dyshohet se kanë përfituar në mënyrë të paligjshme 37 milionë euro nga shteti përmes rimbursimit të TVSH-së.
Në vendin e pestë renditet „PINE Grup“ SHPKNJP Shkup, kompani e cila është e bllokuar nga DAP-i prej tre vitesh dhe ka borxh 336 milionë denarë ose 5,5 milionë euro. DAP-i njofton se ndaj saj është duke u zhvilluar procedura e arkëtimit të detyruar të mjeteve financiare.
Borxhliu i gjashtë më i madh është kompania „Grofler LTD“ SHPKNJP Shkup, e cila ka detyrime prej 5 milionë eurosh, nga të cilat 250.000 euro janë në bazë të tatimit mbi fitimin.
Kompania „Gimashi Kompani“ SHPKNJP Shkup, nga Strumica, ka borxh 294 milionë denarë në të gjitha bazat tatimore.
Kompania çeke „SGSM Oil and Gas Service“, përkatësisht filiali i saj, aktiviteti kryesor i të cilit është tregtia me shumicë e produkteve metalike, gypave, pajisjeve dhe instalimeve për ujësjellës dhe ngrohje qendrore, i detyrohet DAP-it 4 milionë euro, pothuajse tërësisht në bazë të TVSH-së.
Një tjetër kompani e biznesmenit Risto Kërmzov nga Strumica, „Mintikos Tekstil“ SHPKNJP Strumicë, i detyrohet DAP-it rreth 3 milionë euro. Kompania nuk posedon pasuri të luajtshme apo të paluajtshme përmes së cilës mund të bëhet arkëtimi i borxhit.
„Abira Plus“ SHPKNJP nga Kumanova ka borxh pak më pak se 3 milionë euro. Deri në vitin 2018, kjo kompani kumanovare ishte në pronësi të Trajçe Zaevit, kushëririt të ish-kryeministrit Zoran Zaev.
Në listën më të re figurojnë sërish 5.002 debitorë. Te ta janë evidentuar ndryshime të ndryshme në lartësinë e detyrimeve tatimore:
– 3.207 debitorë e kanë rritur borxhin për gjithsej 177 milionë denarë.
– 210 debitorë e kanë zvogëluar borxhin për gjithsej 137 milionë denarë.
– 1.585 debitorë kanë të njëjtën shumë të borxhit.
Dallimi ndërmjet rritjes dhe zvogëlimit të borxhit në këto kategori është 40 milionë denarë, që paraqet rritje neto të detyrimeve në krahasim me listën paraprake.
Në Listën nr. 11/2026 janë evidentuar edhe 198 debitorë të rinj, borxhi i përgjithshëm i të cilëve arrin në 130 milionë denarë.
Nga Drejtoria e të Ardhurave Publike bëjnë të ditur se me publikimin e listës së ardhshme do të japin informacione për masat e ndërmarra për arkëtimin e detyrimeve nga këta debitorë.
Njëkohësisht, 138 debitorë nga lista paraprake, me borxh të përgjithshëm prej 156 milionë denarësh, nuk figurojnë më në listën më të re.
