Një delegacion institucional i Shqipërisë erdhi në Skenderaj për ngushëllime me rastin e vdekjes së Haxhi Thaçit, babait të ish- presidentit Hashim Thaçi.
Këtë delegacion e përbëjnë kryetarja e Kuvendit të Shqipërisë Elisa Spiropali, ministri i Diasporës, Taulant Balla, ambasadori i Shqipërisë në Kosovë Petrit Malaj, bashkëshortja e kryeminstrit Edi Rama, Linda Rama, ish-kryetari i Kuvendit të Shqipërisë, Gramos Ruçi.
Kryetarja e Kuvendit të Shqipërisë, Elisa Spiropali, në fjalën e saj përmendi mungesën e ish presidentit, Hashim Thaçit në varrimin e babait të tij.
“I nderuar Hashim që na mungon në përcjelljen e babait tënd, sepse padrejtësitë politike e kombëtare të burgosjes tënde e luftëtarëve të tjerë sot iu shtua edhe një padrejtësi njerëzore e morale. Haxhi Thaçi është shembulli se si një njëri i thjeshtë mund të bëhet një atdhetar i madh. Kjo është e mundur kur urtësia, njerëzillëku, ndershmëria, lidhjet e forta me njerëzit dhe përkushtimi i përditshëm i një burri që duket i zakonshëm shumëfishohen, ndriçojnë në përkushtimin dhe sakrificat për atdheun, kombin dhe njerëzit”, ka thënë Spiropali.
Ajo tha se në mungesë të Hashim Thaçit në përcjelljen e Haxhi Thaçit ka ardhur e gjithë shqiptaria.
“Baca Haxhi në vend të Hashim kemi ardhur të të përcjellim ne të gjithë, nga Shqipëria e shqiptaria. Të kam sjellë dhe një dorë nga dheu i Shqipërisë”, ka thënë Spiropali.
