Boksieri nga Garana e Kërçovës në Maqedoninë e Veriut e fitoi meçin më të rëndësishëm të karrierës, me ç’rast u stolis edhe me titujt internacional – UBO e UBF.
Në një organizim fantastik dhe në një atmosferë të jashtëzakonshme, Zeqiri u tregua me zemër luani duke fituar në fshatin e tij – Garanë ndaj boksierit nga Venezuela, Gregorio Dominguez.
Zeqiri nuk i zhgënjeu shikuesit që kishin shkuar për ta përcjellë, por as ata që e ndoqën përmes ekraneve televizive.
Ai madje u pa me lot në sy pas vendimit të gjyqtarit pasi ky meç për të ishte special sepse e zhvilloi para njerëzve dhe familjes së tij.
Kjo fitore e madhe ia hap dyert boksierit me banim në Zvicër që tash e tutje të synojë tituj të tjerë, derisa seria e tij është perfekte në boksin profesionist – 6 fitore në 6 meçe.
Një meritë të madhe për këtë organizim dhe për zhvillimin e karrierës së Mersim Zeqirit e ka edhe promotori Avdyl Salihu.
