Drejtori i Arsenalit, Andrea Berta, po punon në mënyrë aktive për të siguruar një marrëveshje të mundshme për Rodrygon e Real Madridit.
Ai ka nisur bisedimet paraprake me përfaqësuesit e lojtarit për të kuptuar mundësinë reale të një transferimi.
Raportet nga Spanja sugjerojnë se Real Madridi mund të pranojë të shesë Rodrygon për një shifër rreth 70 milionë funte. Megjithatë, brenda klubit mbretëror besojnë se vlera e tij e vërtetë është më afër 100 milionë funteve.
Arsenali është i interesuar ta bëjë brazilianin një nga lojtarët më të paguar të skuadrës. Klubi londinez është i gatshëm t’i ofrojë atij një pagë që tejkalon 300,000 funte në javë.
Kjo shifër e vendos Rodrygon në të njëjtin nivel me yjet si William Saliba dhe Bukayo Saka, të cilët pritet të firmosin marrëveshje të reja fitimprurëse.
Pavarësisht interesimit të madh, nuk pritet që një marrëveshje të arrihet menjëherë. Negociatat do të varen edhe nga lëvizjet e Real Madridit në merkato këtë verë.
Rodrygo aktualisht shihet si një pjesë e rëndësishme e projektit të Real Madridit, por ardhja e yjeve të rinj mund të ndryshojë situatën.
Arsenali, ndërkohë, synon të përforcojë repartin ofensivë me një emër të madh, dhe Rodrygo është në krye të listës së dëshirave të tyre.
