Zëdhënësi i Lidhjes Demokratike të Kosovës (LDK), Besian Mustafa, ka theksuar se, nëse LDK udhëheqë qeverinë, vizita e parë zyrtare e “kryeministrit Lumir Abdixhiku do të jetë në Shtetet e Bashkuara të Amerikës, në Capitol Hill”.
Mustafa ka kritikuar kryeministrin aktual Albin Kurti për deklaratat e tij të ndryshuara tani lidhur me marrëveshjen e Uashingtonit.
“Kjo qeveri shkon në Spanjë, Kurti jep deklaratë dhe ndryshon fjalët. Nga një marrëveshje [në Uashington] tradhti kombëtare, nga një marrëveshje që prodhon stabilitet. Por, një qeveri e udhëhequr nga LDK, në krye me Abdixhikun kryeministër vizitën e parë zyrtare do ta realizojë në SHBA, në Uashington, në Capitol Hill, për te rikthyer Kosovën dhe diplomacinë kosovare aty ku e ka interesin me të madh”, ka deklaruar ai.
Ai ka theksuar se qeveria e udhëhequr nga LDK do të rikthejë Kosovën dhe diplomacinë kosovare në rrugën e duhur, duke forcuar marrëdhëniet me SHBA-në dhe avancuar interesat nacionale të Kosovës.
“Besoj se fakti i fotografisë së ish-kryeministrit Hoti në Shtëpinë e Bardhë me presidentin Trump është argumenti më i fuqishëm se LDK ka marrëdhënie të shkëlqyera me Shtëpinë e Bardhë, pavarësisht kush udhëheq administratën,” ka deklaruar Mustafa në Debat Plus.
Ai theksoi se, me Abdixhikun në krye, LDK-ja do të ripërtërijë lidhjet strategjike me SHBA-në dhe do të avancojë statusin dhe sigurinë e Kosovës në arenën ndërkombëtare.
