Derisa sipas rezultateve preliminare të KQZ-së, koalicioni për Familjen nuk arriti të kalonte pragun zgjedhor për të zënë ulëse në Kuvendin e Kosovës, lideri i AKR-së Begjet Pacolli, ka thënë se i vjen keq që humbi një mundësi e rëndësishme për t’i dalë në mbështetje familjes.
Megjithatë, Pacolli thotë se beson fuqishëm që ky koalicion do të vazhdojë punën me shumë përkushtim në mbrojtje të familjes.
Ai ka shprehur mirënjohje ndaj votuesve dhe partnerëve të këtij koalicioni që sipas tij, dhanë gjithçka që kishin në dorën e tyre.
“Shpreh mirënjohje të thellë për partnerët tanë të koalicionit, aktivistët që bënë të mundur zhvillimin e një fushate dinjitoze, si dhe kandidatët për deputetë që garuan me përkushtim. Ju keni dhënë gjithçka që ka qenë në dorën tuaj. Nga ana tjetër, më vjen keq që humbëm një mundësi të rëndësishme për t’i dalë në mbështetje familjes, dinjitetit dhe traditës sonë, vlera këto që mbrohen edhe nga shoqëritë më demokratike në botë. Besoj fuqishëm se ky koalicion në të ardhmen duhet të vazhdojë të punojë me më shumë përkushtim, sepse familja jonë tradicionale meriton të mbrohet dhe të fuqizohet çdo ditë e më shumë”, ka thënë ai.
