Kryeministri Edi Rama u është përgjigjur sot drejtpërdrejt pyetjeve të adresuara nga qytetarët në platformat sociale, duke u ndalur sërish në rëndësinë e procesit të reformave dhe programit qeverisës së Partisë Socialiste, me të cilin pritet që Shqipëria të anëtarësohet në familjen evropiane.
Kryeministri tha se “PS ka një program pune qeverisës që është një program me të cilin po anëtarësojmë Shqipërinë në BE, dhe kjo i thotë të gjitha. BE nuk anëtarëson, nuk i afrohet vendeve që nuk përmbushin standardet dhe kriteret që ka BE në të gjitha aspektet.
Nëse BE na sheh si vendin më të mundshëm për t’u anëtarësuar nga gjithë rajoni, kjo tregon se shikon faktet, standardet dhe çfarë progresi i jashtëzakonshëm është bërë deri tani. Kur ne morëm detyrën ata nuk na llogarisnin fare si një opsion për t’u anëtarësuar në BE në të gjallët tonë”.
Sipas Kryeministrit Rama, “BE do thotë atë që tha ambasadori, që hyrja në BE bëhet në bazë të meritës së vendit. Po si llogariten meritat e vendit nëse vendi i jep mandatin një personazhi apo disa personazheve që janë në halle të hapura me drejtësinë, për të cilët BE nuk është shprehur në asnjë rast dhe as nuk ka lënë të kuptohet se ka ndonjë rezervë për proceset e drejtësisë?”.
Ndër të tjera, një tjetër qytetar i shkruan Kryeministrit Rama se partia e “bufit” është në pikë të hallit dhe e pyet si zgjidhet ky problem.
“Ky problem nuk zgjidhet nëse partia në fjalë nuk kupton që është në pikë të hallit dhe ata që e mbështesin partinë në fjalë dhe pasqyrat e “kënetës” nuk vënë gishtin në plagë, por e kërkojnë plagën gjetkë, nëse ata që mbështesin nga pozicione jo drejtpërdrejta partiake atë farë force vazhdojnë me teoritë që këtu s’ka zgjedhje, këtu krimi. Nuk zgjidhet, sepse këta janë kaq qesharakë, saqë një milion shqiptarë i trajtojnë si të lidhur me krimin, si njerëz që janë shitur, si njerëz që blihen, një çmenduri totale. E vetmja zgjidhje është ajo që ata vetë, ajo parti vetë të kuptojë që duhet ta zgjidhi sepse do të mbetet e pazgjedhshme nga shqiptarët. Kjo është e vërteta”, pohoi Rama.
