Real Madridi kaloi në gjysmëfinale të Ligës së Kampionëve të këtij sezoni të mërkurën, pasi u përball me Manchester Cityn në Etihad Stadium. Ndeshja përfundoi me rezultat 4-4 në total pas 210 minutash, por ishin Los Blancos ata që fituan në fund, duke triumfuar 4-3 në goditjet nga pika e bardhë.
Los Blancos morën një epërsi të hershme në Etihad përmes Rodrygo Goes, përpara se të shfaqte një paraqitje luftarake kundër kampionëve në fuqi.
Carlo Ancelotti ishte absolutisht i kënaqur me instinktet luftarake të skuadrës së tij kundër Cityt, pasi ashtu e tha pas ndeshjes.
“Ne filluam mirë, morëm epërsinë dhe më pas vuajtëm, luftuam, sakrifikuam. U mbrojtëm shumë thellë, City kishte më shumë kontroll, megjithëse ata gjithmonë kanë më shumë kontroll. Mendoj se u mbrojtëm shumë, shumë mirë”, ka thënë fillimisht Ancelotti.
“Ne e kemi parë Real Madridin shumë herë këtë sezon, gjë që nxjerr në pah diçka që askush nuk e kishte menduar se do ta kishim. Në penallti ishim shumë të bindur se do të kualifikoheshim. Natyrisht që më pëlqen shumë kur shoh një ekip që sakrifikon dhe lufton, si dhe cilësinë… Fitimi këtu mund të bëhet vetëm në këtë mënyrë”.
Real Madridi do të përballet në gjysmëfinale me Bayern Munichun, por në të ardhmen e afërt do të përballet me Barcelonën në ndeshjen e radhës të dielën.
Pavarësisht përpjekjeve të tyre në Mançester, Ancelotti pret që lojtarët e tij të rikuperohen me kohë për El Clasico.
“Nuk kemi asnjë problem fizik dhe kemi kohë deri të dielën për t’u rikuperuar. Këtu do të flemë të qetë për t’u rikuperuar dhe për të kuptuar se kemi arritur diçka shumë të mirë. Të gjithë menduan se ne kishim vdekur, por Real Madridi nuk dorëzohet kurrë sepse Real Madridi nuk vdes kurrë”, përfundoi italiani.
