Paneli Zgjedhor për Ankesa dhe Parashtresa (PZAP), ka refuzuar të gjitha ankesat e paraqitura nga subjektet politike që kundërshtonin rezultatet zgjedhore, duke theksuar se ato nuk kishin prova të mjaftueshme ligjore për të justifikuar rinumërimin apo anulimin e votave.
Kështu ka njoftuar Eugen Cakolli nga Instituti Demokratik i Kosovës (KDI), i cili ka potencuar se pretendimet për parregullsi duhet të mbështeten në prova konkrete dhe jo në hamendësime apo trende të votave.
“Tashmë, sipas procedurave ligjore, subjektet politike kanë 48 orë nga pranimi i vendimit të PZAP për të ushtruar të drejtën e tyre për apelim në Gjykatën Supreme. Kjo e fundit ka 96 orë për të shqyrtuar dhe vendosur mbi këto ankesa,” ka shkruar Cakolli në Facebook.
Sipas tij, nëse nuk ka ndryshim të qëndrimeve edhe në Gjykatën Supreme, rezultatet e zgjedhjeve pritet të certifikohen më së largu në mes të javës së ardhshme.
