Shkup, 20 shkurt – Deputetët njëzëri miratuan konkluzionet e debatit publik për sigurinë në trafik. Nevoja për ashpërsimin e politikës ndëshkuese përmes ndryshimit të Kodit Penal dhe ndryshimit dhe plotësimit të 4 ligjeve si dhe nevoja për përshpejtimin e aktiviteteve për zbatimin e plotë dhe efikas të sistemit “Safe City”, më së voni deri në fund të këtij viti, janë vetëm dy nga gjithsej 12 konkluzionet e miratuara.
“Theksohet nevoja për ashpërsimin e politikës ndëshkuese përmes ndryshimit dhe plotësimit të Kodit Penal, Ligjit për Kundërvajtjet, Ligjit për Sigurinë e Trafikut Rrugor, Ligjit për Rrugët Publike, Ligjit për Ekzekutimin e Sanksioneve dhe harmonizimit të ndërsjellë të tyre, më së voni deri në fund të vitit 2025… Gjithashtu, kërkohet përshpejtimi i aktiviteteve për zbatimin e sistemit “Qyteti i Sigurt”, si në aspektin e infrastrukturës teknike ashtu edhe në harmonizimin e ligjeve të nevojshme për funksionimin e sistemit, më së voni deri në fund të vitit 2025”, deklaroi Lupço Prenxhov, Kryetar i komisionit për sistem politik dhe marrëdhënie mes bashkësive.
Rekomandohet që të hartohet plan strategjik ndërinstitucional për rrjet të përbashkët të MPB-së me gjykatat dhe prokurorinë, me qëllim të komunikimit më të shpejtë elektronik dhe uljen e mundësisë për keqpërdorim të sistemit.
“Theksohet nevoja që institucionet përkatëse të sigurojnë kontroll më të madh mbi autoshkollat dhe edukim të vazhdueshëm instruktorëve për trajnimin e kandidatëve për shoferë.06:48 Theksohet nevoja që institucionet përkatëse të sigurojnë kontrolle më të rrepta në qendrat e kontrollit teknik të automjeteve që hyjnë në qarkullim. Theksohet nevoja për masa parandaluese dhe rekomandohet që Këshilli Republikan për Sigurinë e Trafikut Rrugor të forcojë aktivitetet për rritjen e kulturës së sigurisë në trafik”, shtoi Lupço Prenxhov, Kryetar i komisionit për sistem politik dhe marrëdhënie mes bashkësive.
Konkluzionet do t’u dorëzohen institucioneve kompetente dhe pritet që ndaj tyre të veprohet më së voni deri në fund të vitit. Debati publik, u iniciua pas aksidentit tragjik më 29 janar, kur Frosina Kullakova u përplas për vdekje nga një 20 vjeçar i cili ishte nën ndikimin e alkoolit dhe pa patentë shoferi.
