Shkup, 15 janar – Ministri i Punëve të Jashtme dhe Tregtisë së Jashtme, Timço Mucunski, sot ka pritur në takim lamtumirës ambasadorin e akredituar të Komonuelthit të Australisë në vendin tonë, Daniel Emeri, bën të ditur ministria.
Në takim, ministri Mucunski falënderoi ambasadorin Emeri për siç tha, kontributin e tij të rëndësishëm në avancimin e marrëdhënieve bilaterale ndërmjet dy vendeve gjatë mandatit të tij.
Gjatë bisedës, bashkëbiseduesit iu referuan shënimit të përvjetorit – 30 vjet nga vendosja e marrëdhënieve bilaterale ndërmjet dy vendeve, si dhe rolin e rëndësishëm që ka luajtur diaspora maqedonase në Australi. Ata vlerësuan se kjo paraqet një urë të vërtetë që lidh qytetarët e dy vendeve dhe një faktor domethënës në bashkëpunimin dypalësh.
Theks i veçantë është vënë në mundësitë e avancimit të bashkëpunimit ekonomik dhe rritjen e këmbimit tregtar mes dy vendeve.
Ministri Mucunski dhe ambasadori Emeri diskutuan edhe për thellimin e bashkëpunimit në disa fusha me interes të përbashkët, duke përfshirë fushën e arsimit, shkencës, shëndetësisë, kulturës dhe turizmit. Në takim u shkëmbyen mendime edhe për situatën aktuale politike dhe të sigurisë në rajon dhe më gjerë.
