Shkup, 29 prill – Arben Taravari nga VLEN ka dalë me akuza deri te BDI-ja, pasi siç thotë, është duke bërë presion ndaj bizneseve, transmeton TV21. Taravari përmendi edhe Bashkësinë Fetare Islame në Gostivar, pasi siç thotë, kanë hapur shtab të BDI-së në kuadër të hapësirave të saja.
“Me gjithë këto mekanizma që i përdor BDI-ja dhe me gjithë këto para që i ka, me gjithë këto institucione, unë prej këtu do të kisha bërë një apel deri te Policia në Gostivar, posaçërisht në fshatin Çegran, por edhe institucioneve të tjera të cilat u bëjnë presion bizneseve. I kemi me emra dhe mbiemra. I kemi edhe “skrin shote”. Le ta mendojnë se më 9 maj do të kemi Qeveri të re dhe këto njerëz do të përgjigjen. Gjithashtu Bashkësisë Fetare Islame në Gostivar do t’i kisha bërë një ftesë speciale, sepse kanë bërë shtab në kuadër të Bashkësisë Fetare Islame në Gostivar, shtab i cili punon special për BDI-në”, tha Taravari.
