Klubi nga Arabia Saudite, Al-Shabab thuhet se ka vonuar për tre muaj pagat e të gjithë futbollistëve të skuadrës.
Sipas gazetës lokale Ar Riyadiyah, Al-Shabab ka vonuar pagesat e pagave për lojtarët vendas dhe të huaj për tre muaj.
Menaxhmenti i klubit kishte premtuar se do ta zgjidhte këtë çështje deri në fund të shkurtit, por pasi nuk ia dolën, lojtarët e frustruar refuzuan të merrnin pjesë në stërvitje.
Pavarësisht përpjekjeve për të ndërmjetësuar situatën, lojtarët u takuan me trajnerin Fatih Terim, shpjeguan qëndrimin e tyre dhe u larguan nga objekti stërvitor.
Raportet tregojnë se klubi kërkon afërsisht 10.67 milionë dollarë për të mbuluar pagat për lojtarët, stafin stërvitor dhe personelin administrativ.
Ndryshe, përveç Terim, emrat tjerë të njohur te klubi saudit janë Yannick Carrasco, Daniel Podence, Giacomo Bonaventura dhe Robert Renan.
