Policia e Kosovës ka njoftuar për tri raste të vjedhjes në Prishtinë dhe Fushë Kosovë.
Sipas raportit të policisë, rasti i parë ka ndodhur në Prishtinë rreth orës 22:10 ku janë arrestuar dy persona, pasi që të njëjtit kishin kryer vjedhje në një market.
Gjësendet e vjedhura janë gjetur dhe janë kthyer pronarit. Pas intervistimit, me vendim të prokurorit, të dyshuarit janë dërguar në mbajtje.
Rasti tjetër gjithashtu ka ndodhur në kryeqytet ku një shtetase e Maqedonisë së Veriut është arrestuar nën dyshimin se ka kryer vjedhje në dyqanin e ankuesit kosovar.
Gjërat e vjedhura janë sekuestruar nga policia, ndërsa e dyshuara është dërguar në mbajtje me vendim të prokurorit.
E në Fushë Kosovë, gjithashtu është arrestuar një shtetas i Maqedonisë së Veriut, me dyshimin për kryerjen e disa rasteve të vjedhjeve dhe vjedhjeve të rënda.
