Pas ndeshjes çerekfinale të Kupës së Turqisë mes Fenerbahçes dhe Galatasarayt (1-2), ka ndodhur një incident mes trajnerit Jose Mourinho dhe Okan Buruk dhe tani është zbuluar se çfarë i ka paraprirë konfliktit të tyre.
Sipas një raportimi të gazetës turke Milliyet, Mourinho iu afrua gjyqtarëve pas ndeshjes, duke shprehur pakënaqësinë e tij për arbitrimin e tyre.
“Ju e keni arbitruar lojën keq”, thuhet t’i ketë thënë Mourinho gjyqtarëve.
Okan Buruk, duke i uruar gjyqtarët, u përgjigj: “Mos e besoni. Ju e menaxhuat mirë ndeshjen. Morët vendimet e duhura”.
Pas kësaj, Buruk iu drejtua Mourinhos me fjalët: “Lojë e mirë”, gjë që thuhet se ka provokuar trajnerin portugez.
Më pas thuhet se Buruk i ka drejtuar një fjalë fyese Mourinhos në anglisht, pas së cilës portugezi ka reaguar duke e kapur turkun për hunde.
Për shkak të këtij veprimi, Mourinho mori karton të kuq dhe me gjasë e pret një dënim i rëndë deri në 10 ndeshje pezullim.
