Të paktën dhjetë palestinezë u vranë dhe dhjetëra të tjerë u plagosën në sulmet e fundit ajrore izraelite mbi shtëpi banimi dhe një shkollë që strehon familje të zhvendosura në Rripin e Gazës, transmeton Anadolu.
Në rajonin e Gazës Veriore, burimet mjekësore raportuan se katër palestinezë u vranë dhe disa të tjerë u plagosën kur një avion luftarak izraelit goditi një shtëpi në Jabalia Nazla.
Dy palestinezë të tjerë u plagosën kur një sulm ajror izraelit goditi një ndërtesë në të njëjtën zonë, shtuan burimet.
Po ashtu, një dron izraelit shënjestroi Spitalin Kamal Adwan në Beit Lahia, në veri të Gazës, thanë dëshmitarët.
Në qytetin e Gazës, dy palestinezë u vranë dhe disa të tjerë u plagosën kur helikopterët izraelitë goditën shkollën Yaffa në lagjen Tuffah, ku gjendeshin të strehuara familje të zhvendosura, njoftuan burime mjekësore në rajon.
Në Gazën qendrore, forcat izraelite shkatërruan ndërtesa në veriperëndim të kampit Nuseirat, sipas dëshmitarëve.
Zjarri i artilerisë shënjestroi zonat veriore të Nuseiratit, kampin lindor Maghazi dhe lindjen e Khan Younisit në Gazën jugore, thanë ata.
Ndërkaq, Autoriteti i Mbrojtjes Civile Palestineze raportoi se ekipet e shpëtimit gjetën trupat e dy viktimave pranë Sallës Rimas në zonën Khirbat al-Adas, në verilindje të qytetit Rafah në Gazën jugore.
Në Khan Younis, burimet mjekësore thanë se dy burra nga familja Daghma u vranë në një sulm ajror izraelit që synoi një grup civilësh në lindje të qytetit Abasan al-Jadida.
Izraeli ka nisur një luftë gjenocidale në Rripin e Gazës që ka vrarë më shumë se 44.800 viktima, kryesisht gra dhe fëmijë, që nga një sulm nga grupi i rezistencës palestineze, Hamas, më 7 tetor 2023.
Gjenocidi, tashmë në vitin e dytë, ka shkaktuar reagime ndërkombëtare në rritje, me zyrtarë dhe institucione që i etiketojnë sulmet dhe bllokimin e dërgesave të ndihmave si përpjekje të qëllimshme për të shkatërruar popullsinë palestineze.
Gjykata Ndërkombëtare Penale (GJNP) lëshoi urdhra arresti muajin e kaluar për kryeministrin izraelit Benjamin Netanyahu dhe ish-shefin e tij të mbrojtjes Yoav Gallant për krime lufte dhe krime kundër njerëzimit në Gaza.
Izraeli gjithashtu përballet me një çështje gjenocidi në Gjykatën Ndërkombëtare të Drejtësisë për luftën e tij kundër Gazës.
