Gjatë Samitit të NATO-s që u mbajt në Hagë të Holandës, presidenti amerikan, Donald Trump, teksa tregoi për një telefonatë nga presidenti rus, Vladimir Putin, tha se “e dini, javët e fundit u morëm me Indinë dhe Pakistanin, Kosovën dhe Serbinë”.
“Më telefonoi një ditë dhe më tha ‘a mund të të ndihmoj me Iranin? I thashë: Jo. Mund të më ndihmosh me Rusinë, sepse, e dini, javët e fundit u morëm me Indinë dhe Pakistanin, Kosovën dhe Serbinë. Mendoj se të premten do të merremi me Kongon dhe Ruandën, çështje që po vijnë”, tha Trump.
Ditë më parë, Trumpi tha se për punën e tij në normalizimin e raporteve mes Kosovës dhe Serbisë, gjatë administratës së tij të parë, atij do t’i duhej t’ia jepnin çmimin Nobel për Paqe.
“Do të duhej të ma jepnin Çmimin Nobel për Ruandën apo Kongon, mund të themi edhe për Serbinë dhe Kosovën, mund të thoni edhe për shumë tjerë, dhe e madhja është India dhe Pakistani…”, u shpreh ai, për të vazhduar: “Nuk ma japin mua, ua japin vetëm liberalëve”. /rtk
