Sekretari i Përgjithshëm i NATO-s, Mark Rutte, ka folur me rastin e shënimit të 30-vjetorit të gjenocidit serbë në Srebrenicë, duke theksuar se tmerret që ndodhën nuk duhet të harrohen kurrë.
Në fjalimin e tij, Rutte tha se është detyrë e të gjithëve të ndërtojnë një të ardhme më të ndritur.
“Sot shënojmë 30-vjetorin e gjenocidit në Srebrenicë, një tragjedi që tronditi botën dhe që përgjithmonë lidhi vendin tim me tuajin. Kam vizituar Potoçarin si kryeministër i Holandës. Kurrë nuk do t’i harrojmë tmerret e atyre ditëve, dhe mendimet tona janë me të gjithë ata që u prekën. Është detyrimi ynë të ndërtojmë një të ardhme më të ndritur”, tha Rutte.
Më pas, ai u ndal edhe tek roli i NATO-s “Dejtoni ndoshta nuk është i përsosur, por mbetet gur themeli për një Bosnje dhe Hercegovinë stabile. NATO ndërhyri në Bosnje për të ndihmuar në ndalimin e një konflikti që mori qindra mijëra jetë nga të gjitha komunitetet. Atëherë ishim pranë jush. Për 30 vjet kemi ofruar stabilitet në rajon. Jemi me ju sot dhe do të jemi edhe në të ardhmen. Nuk do të lejojmë një vakum sigurie, dhe ju nuk duhet të lejoni që retorika përçarëse t’ju tërheqë pas”.
Në fund, ai foli edhe për takimet që ka pasur me studentët në Sarajevë “pashë shpresë për një të ardhme më të ndritur në fytyrat e studentëve që takova në Sarajevë. Ne u detyrohemi atyre dhe kujtimit të një gjenerate të humbur që të ndërtojmë paqe dhe mirëqenie. Çdo ditë, për të gjithë”.
Kujtojmë se në masakrën e Srebrenicës në korrik të vitit 1995, vlerësohet se janë vrarë rreth 8,000 burra dhe djem boshnjakë myslimanë, raporton klix.ba.
Ndryshe, gjenocidi në Srebrenicë nuk është vetëm fakt moral, por edhe ligjor – është vërtetuar nga Gjykata Ndërkombëtare e Drejtësisë (ICJ), Tribunali Penal Ndërkombëtar për ish-Jugosllavinë (ICTY), si dhe Gjykata e Bosnje e Hercegovinës.
Deri më tani, 54 persona janë dënuar me gjithsej 781 vite burg, përfshirë pesë dënime të përjetshme.
Ndër të dënuarit janë udhëheqësit më të lartë ushtarakë dhe politikë të Republikës Serbe dhe të ushtrisë serbe të Bosnjës.
