Në gjysmën e parë të vitit 2026, produkti i brendshëm bruto (PBB) i Kinës u rrit me 4.7% krahasuar me të njëjtën periudhë të vitit të kaluar, duke arritur në 69.57 trilionë juanë (10.28 trilionë dollarë), treguan të dhënat nga Byroja Kombëtare e Statistikave(BKS) të mërkurën.
Treguesit kryesorë ekonomikë të vendit kanë treguar performancë të fortë, me nxitës të rinj të rritjes që po zgjerohen me shpejtësi, duke sinjalizuar qëndrueshmëri të ekonomisë.
Në gjashtë muajt e parë të vitit 2026, prodhimi industrial me vlerë të shtuar i ndërmarrjeve industriale të Kinës mbi madhësinë e përcaktuar, ndërmarrje me të ardhura vjetore prej të paktën 20 milionë juanësh, u rrit me 5.4%. Vlen të përmendet se prodhimi industrial me vlerë të shtuar i prodhimit të pajisjeve dhe prodhimit të teknologjisë së lartë, u rrit përkatësisht me 9.3% dhe 13.3%.
Shitjet me pakicë të mallrave dhe shërbimeve, një tregues kyç i forcës së konsumit të vendit, u zgjeruan me 2.7% nga viti në vit. Vlera e shitjeve të përgjithshme me pakicë të mallrave të konsumit arritën në 24.87 trilionë juanë gjatë periudhës janar-qershor. Ndërkohë, sektori i shërbimeve u zgjerua gjithashtu, me prodhimin që u rrit me 5.2%.
Tregtia e jashtme e Kinës pati një rritje të fuqishme gjatë kësaj periudhe, me importe dhe eksporte që arritën në përgjithësi 25.47 trilionë juanë, një rritje prej 16.9% nga viti në vit.
Investimet në asete fikse, duke përjashtuar familjet rurale, ranë me 5.7% nga viti në vit duke arritur në 22.64 trilion juanë. Në përgjithësi, performanca ekonomike e Kinës, mbeti brenda një diapazoni të arsyeshëm në gjysmën e parë të këtij viti, me forca të reja prodhuese cilësore që vazhduan të fitonin vrull, sipas Mao Shengyong, zëvendëskryetar i BKS. Megjithatë, me pasiguritë e jashtme në rritje dhe çekuilibrat midis ofertës dhe kërkesës së brendshme, themeli për rimëkëmbje të qëndrueshme ekonomike ende duhet të konsolidohet, shtoi Mao.
Pikat kryesore të forta të ekonomisë së Kinës në gjysmën e parë të vitit ishin rimëkëmbja e konsumit, rritja e të ardhurave rurale dhe qëndrueshmëria e prodhimit të teknologjisë së lartë. Nga ana negative, investimet vazhduan të dobësoheshin, shfrytëzimi i kapaciteteve ra dhe shpenzimet e konsumatorëve mbetën të ulëta, sipas Bruce Pang, profesor i asociuar në Shkollën e Biznesit CUHK.
Ekonomia pritet të ruajë një rimëkëmbje të moderuar në gjysmën e dytë të vitit, tha Pang, duke shtuar se përpjekjet politike do të duhet të përqendrohen në stabilizimin e investimeve, rritjen e kërkesës së brendshme dhe mbështetjen e përmirësimit industrial.
