Një delegacion i rangut të lartë turk zhvilloi bisedime në Bagdad të enjten, duke diskutuar çështjet kryesore të sigurisë dhe energjisë përpara një vizite të pritshme të presidentit turk, tha ministri i jashtëm irakian Fuad Hussein.
Presidenti turk Rexhep Tajip Erdogan pritet të vizitojë Irakun më vonë këtë vit, por ende nuk është shpallur një datë. Ministri i Jashtëm turk Hakan Fidan, ministri i mbrojtjes Yasar Guler dhe shefi i inteligjencës Ibrahim Kalin ndoqën bisedimet me homologët e tyre irakianë.
“Ne diskutuam një gamë të gjerë çështjesh dypalëshe dhe rajonale dhe vizitën e ardhshme,” tha ministri irakian në X, dikur Twitter.
“Ne theksuam nevojën për të forcuar bashkëpunimin në fushën e sigurisë, tregtisë, energjisë, ujit, arsimit dhe gjithçka që është në interes të vendeve tona”, shtoi Husein.
Marrëdhëniet midis dy vendeve janë acaruar nga operacionet e përsëritura ushtarake turke kundër rebelëve kurdë në Irakun verior, si dhe nga grindjet rreth eksporteve të naftës dhe ndarjes së furnizimeve të pakta me ujë. Mosmarrëveshja mbi eksportet e naftës nga rajoni autonom kurd i Irakut ka qenë një pikë e veçantë pengese. Gati një dekadë pasi kërkoi arbitrazh ndërkombëtar, qeveria federale irakiane vitin e kaluar fitoi njohjen e të drejtës së saj për të kontrolluar eksportet e naftës kurde dhe Ankaraja u urdhërua të paguante 1.5 miliardë dollarë dëmshpërblim për transportimin e tyre pa miratimin e Bagdadit. Në shenjë proteste, Ankaraja mbylli tubacionin e eksportit.
Zëdhënësi i ministrisë së jashtme turke Oncu Keceli tha të mërkurën se shpresonte se tubacioni do të rihapet “sa më shpejt të jetë e mundur”. Ai shtoi se Erdogan do të diskutojë detajet gjatë vizitës së tij.
