Shkencëtarët në Korenë e Jugut kanë shpallur një rekord të ri botëror për kohëzgjatjen (48 sekonda) e mbajtjes së temperaturave prej 100 milionë gradë Celsius – shtatë herë më të nxehta se bërthama e diellit – gjatë një eksperimenti të shkrirjes bërthamore, në atë që ata thonë se është një hap i rëndësishëm përpara për teknologjinë e energjisë, shkruan CNN.
Shkrirja bërthamore kërkon të përsërisë reagimin që bën diellin dhe yjet e tjerë të shkëlqejnë, duke shkrirë së bashku dy atome për të çliruar sasi të mëdha energjie.
Shpesh i quajtur si ‘grali i shenjtë’ i zgjidhjeve klimatike të energjisë së pastër, fuzioni ka potencialin të sigurojë energji të pakufishme pa ndotjen e karbonit që ngroh planetin. Por ky proces në Tokë është jashtëzakonisht sfidues.
Mënyra më e zakonshme për të arritur energjinë e shkrirjes përfshin një reaktor në formë petulle të quajtur tokamak, në të cilin variantet e hidrogjenit nxehen në temperatura jashtëzakonisht të larta për të krijuar një plazmë.
“Temperatura e lartë dhe plazmat me densitet të lartë, në të cilat reaksionet mund të ndodhin për kohëzgjatje të gjata, janë jetike për të ardhmen e reaktorëve të shkrirjes bërthamore”, tha Si-Woo Yoon, drejtor i qendrës së kërkimeve KSTAR në Institutin korean të Energjisë së Fusionit (KFE), i cili arriti rekordin e ri.
Mbajtja e këtyre temperaturave të larta “nuk ka qenë e lehtë për t’u demonstruar për shkak të natyrës së paqëndrueshme të plazmës me temperaturë të lartë”, tha ai për CNN, prandaj ky rekord i fundit është kaq domethënës.
