Ministri i Jashtëm turk Hakan Fidan tha të shtunën se rezistenca kundër pushtimit izraelit nuk është më një luftë midis Izraelit dhe Palestinës, por një luftë midis shtypësve dhe të shtypurve në mbarë botën, transmeton Anadolu.
Duke folur në Samitin e 15-të të Organizatës së Bashkëpunimit Islam (OBI) të mbajtur në Banjul, kryeqyteti i Gambisë, Fidan theksoi se asnjë nga anëtarët nuk ka të drejtë të zgjidhë problemet e tyre përpara çështjes së palestinezëve.
Duke vënë në dukje se Izraeli i ka shpëtuar përgjegjësisë, Fidan tha se është detyrë e gjithë komunitetit musliman global të bashkojë radhët për të mbrojtur palestinezët.
Ai nënvizoi se vendet muslimane duhet të dëshmojnë unitetin e tyre dhe se mund të arrijnë rezultate me mjete diplomatike dhe kur është e nevojshme, me mjete shtrënguese.
Fidan tërhoqi vëmendjen ndaj ndarjeve historike midis shteteve muslimane dhe tha se këto nuk duhet të përsëriten për të sakrifikuar çështjen palestineze për rivalitetet rajonale.
Fituesi i vetëm në një situatë të tillë do të ishte Izraeli dhe mbështetësit e tij, paralajmëroi ai.
Fidan u kërkoi të gjitha vendeve muslimane që të ushtrojnë presion mbi Izraelin për t’i dhënë fund shtypjes së tij ndaj palestinezëve dhe për të nxitur një zgjidhje me dy shtete, duke përdorur të gjitha mjetet për ta bërë këtë dhe për të treguar se shkelja e ligjit ndërkombëtar vjen me pasoja.
Ai theksoi se njerëzit e vendeve muslimane presin rezultate konkrete nga samiti në Banjul, duke shtuar se njohja e Palestinës nga më shumë vende do t’i jepte një goditje të rëndësishme Izraelit.
Fidan nënvizoi se vendet e OBI-së duhet të bëjnë të gjitha përpjekjet për të siguruar anëtarësimin e plotë të Palestinës në OKB.
Samiti i 15-të i OBI-së filloi të shtunën në Gambia.
