Hungaria, Greqia dhe Italia kanë programet më të mira të vizave të arta në Evropë, sipas gjetjeve të firmës këshillimore financiare Aaron Capital.
Sipas asaj analize, kur bëhet fjalë për programet evropiane përmes investimeve, këto tre vende janë zgjedhjet më të kërkuara nga qytetarët e huaj, raporton Shengen.News.
Armand Arton, presidenti i Arton Capital, tha për Business Insider se pesë programet kryesore të vizave të arta në botë përfshijnë Hungarinë, Greqinë, Italinë, Emiratet e Bashkuara Arabe dhe Antigua dhe Barbuda.
“Gjatë pandemisë Covid-19, shumë investitorë amerikanë nuk mund të hynin në Evropë, kështu që tani ata po kërkojnë programe qëndrimi në vendet evropiane. Pas zgjedhjeve në Francë dhe Britani të Madhe, ne mund të shohim gjithashtu miliona në ato vende që kërkojnë të zhvendosen”, tha Arton.
Programet e vizave të arta u mundësojnë të huajve të marrin rezidencën në vendet që ofrojnë programe të tilla në këmbim të investimeve financiare dhe plotësimit të kushteve të nevojshme. Megjithatë, programe të tilla janë shpesh objekt kritikash për shkak të pastrimit të parave dhe korrupsionit, por ende ofrohen në disa vende evropiane, edhe pse BE-ja kërkon që këto vende t’i shfuqizojnë sa më shpejt që të jetë e mundur.
Hungaria
Hungaria nisi programin e saj Golden Visa në vitin 2013, i cili shpejti tërhoqi një numër të madh investitorësh të huaj, duke e bërë atë një nga programet e tilla më të njohura në Evropë.
Programi u ndërpre në vitin 2017, megjithatë qeveria hungareze vendosi ta rifillojë atë më 1 korrik të këtij viti, dhe tani njihet edhe si Programi i Investitorëve Vizitues (GIP).
Një nga arsyet që programi Golden Visa i Hungarisë ka tërhequr interes në rritje nga shtetas të huaj të pasur është se vendi ofron një mundësi për të investuar në pasuri të paluajtshme, e cila u shfuqizua në vende si Portugalia dhe Spanja si pjesë e përpjekjeve për të adresuar krizën e strehimit.
Që nga fillimi i tij në janar 2013 deri më 31 mars 2017, programi Golden Visa i ka sjellë Hungarisë gjithsej 1.4 miliardë euro.
Greqia
Greqia njihet edhe për programin e saj Golden Visa. Megjithatë, në përpjekje për të zgjidhur krizën e strehimit, programi i Vizës së Artë në Greqi ka pësuar ndryshime që hynë në fuqi më 1 shtator të këtij viti.
Një nga ndryshimet është rritja e shumës minimale të kërkuar për investimet e kryera përmes këtij programi.
Duke njoftuar ndryshimet e reja, kryeministri grek Kyriakos Mitsotakis tha se në disa pjesë të vendit, si në Mykonos, Santorini dhe Selanik, investimi minimal i kërkuar për vizën e artë do të arrijë në 800 mijë euro.
Së fundmi, kryeministri i Greqisë bëri të ditur gjithashtu se vizat e arta do të jepen edhe për sipërmarrësit, që do të thotë se të huajt do të mund të marrin një leje qëndrimi pesëvjeçare në vend duke investuar 250 mijë euro në startup-et në vend.
Italia
Programi i Vizës së Artë të Italisë, i njohur si Viza e Investitorëve për Italinë, është gjithashtu i popullarizuar në mesin e shtetasve të huaj që planifikojnë të marrin rezidencën në vendet evropiane përmes këtij programi.
Shtetasit e huaj më të pasur mund ta përdorin këtë program duke zgjedhur disa opsione investimi të ofruara, ndër të cilat janë një investim prej 2 milionë euro në obligacione shtetërore, 500,000 euro në obligacione ose aksione të korporatave ose të paktën 250,000 euro në startup-e inovative.
