Të paktën 60 persona janë vrarë nga sulmet e fundit izraelite në Luginën lindore Bekaa të Libanit, bën me dije ministria libaneze e shëndetësisë. Mes viktimave ishin dhe dy fëmijë nga bombat që goditën 16 zona në rajonin e Baalbek.
Ministria tha gjithashtu se 58 persona u plagosën, duke shtuar se përpjekjet e shpëtimit ishin ende duke u zhvilluar në luginë, e cila konsiderohet një bastion i Hezbollahut.
Izraeli ka kryer mijëra sulme ajrore në të gjithë Libanin gjatë pesë javëve të fundit, duke synuar infrastrukturën dhe armët e Hezbollahut, shkruan A2.
Guvernatori i Baalbek, Bachie Khodr i quajti sulmet më të dhunshmet në rajon që kur Izraeli përshkallëzoi konfliktin kundër Hezbollahut muajin e kaluar.
Armiqësitë ndërkufitare midis Izraelit dhe Hezbollahut shpërthyen pasi grupi i armatosur libanez filloi të gjuante raketa në Izraelin verior në mbështetje të palestinezëve, një ditë pas sulmit vdekjeprurës të aleatit të tij Hamas në Izraelin jugor.
