Kina ka paraqitur dy raporte në sekretariatin e Konventës Kuadër të Kombeve të Bashkuara për Ndryshimet Klimaterike, duke detajuar veprimet dhe progresin e saj klimaterik, njoftoi Ministria e Ekologjisë dhe Mjedisit, citon “Xinhua”.
Këto dokumente, raporti i parë dyvjeçar i transparencës për ndryshimet klimaterike dhe raporti i katërt i përditësuar dyvjeçar, u dorëzuan siç ishte planifikuar në fund të vitit 2024.
Raportet përfshijnë inventarin kombëtar të gazeve serrë të Kinës, progresin në kontributin e përcaktuar në nivel kombëtar, veprimet e politikave dhe efektet e tyre për reduktimin e emetimeve, ndikimet e ndryshimeve klimaterike, si dhe nevojat dhe mbështetjen financiare dhe teknologjike.
Foto nga VCG
Emetimet e dyoksidit të karbonit të Kinës për njësi të PBB-së ishin ulur me më shumë se 50 për qind në vitin 2021 krahasuar me vitin 2005, me stokun e saj pyjor me mbi 6.49 miliardë metra kub, thanë raportet.
Deri në vitin 2023, lëndët djegëse jofosile përbënin 17.9 për qind të konsumit total të energjisë në Kinë, ndërsa deri në tetor 2024, kapaciteti total i instaluar i energjisë së erës dhe diellit në vend kishte arritur në 1.28 miliardë kilovat.
Në raporte thuhet se zbatimi i objektivave të ndryshëm është në rrugën e duhur, me qëllimet për stokun pyjor dhe kapacitetin total të instaluar të energjisë së erës dhe diellore që janë arritur përpara afatit.
Raportet vlerësuan ndikimin e ndryshimeve klimaterike në ekosistemet natyrore dhe zhvillimin social dhe ekonomik të Kinës, si dhe humbjet dhe dëmet e lidhura me to.
Në këto raporte, Kina ndau gjithashtu politikat dhe përvojat e vendit në luftimin e ndryshimeve klimaterike.
