Miliarderi Bernard Arnault ka kritikuar qeverinë franceze për propozimin e një rritje taksash që do të godiste kompanitë më të vlefshme të Francës.
“Kur të ktheheni në Francë dhe të shihni se ne jemi gati të rrisim taksat me 40 për qind për kompanitë që prodhojnë në Francë, është e pabesueshme…”, ka thënë kreu i gjigantit të mallrave luksoze LVMH të martën, shkruan Politico, përcjell Telegrafi.
Në vend të kësaj, Arnault vlerësoi “recetën ekonomike miqësore ndaj biznesit” të presidentit të SHBA-së, Donald Trump, i cili po planifikon të ulë masivisht taksat dhe burokracinë, si dhe “të çlirojë energjinë amerikane”.
Ndryshe, 75-vjeçari, i cili është njeriu më i pasur në Evropë, mori pjesë në inaugurimin e Trump në Uashington javën e kaluar.
“Sapo jam kthyer nga SHBA dhe pashë erën e optimizmit që mbretëronte në atë vend. Dhe kur të ktheheni në Francë, është paksa një dush i ftohtë”, citohet të ketë thënë më tej Arnault.
Ligjvënësit francezë do të nisin të enjten negociatat mbi buxhetin e propozuar të kryeministrit François Bayrou për vitin 2025, i cili përfshin rritjen e taksave në vlerë prej 53 miliardë eurosh dhe shkurtime shpenzimesh që synojnë të frenojnë deficitin buxhetor të Francës në rritje.
Ndër këto masa është një rritje në normën e taksës së korporatave, e cila do të ngjitej në 41.2 për qind për korporatat fitimprurëse me një qarkullim prej më shumë se 3 miliardë euro, si LVMH.
Ministri i Financave Eric Lombard tha se masa e jashtëzakonshme do të jetë në fuqi vetëm për një vit, por Arnault nuk i beson këtij premtimi.
“Askush nuk e beson”, tha ai në margjinat e konferencës për shtyp, raportoi e përditshmja franceze Le Figaro.
Ndërkohë ministri i Shërbimit Civil, Laurent Marcangeli u përgjigj duke thënë se rritja e taksave ishte “një e keqe e domosdoshme” në një intervistë me RTL të Francës të mërkurën.
Dhe me perspektivën ekonomike në Francë “që duket e zymtë”, Arnault tha se LVMH, e cila zotëron Louis Vuitton, Dior, Fendi dhe Moët & Chandon, po konsideron “seriozisht” hapjen e më shumë fabrikave në Shtetet e Bashkuara.
Një veprim i tillë do ta ndihmonte kompaninë të shmangte tarifat që Trump ka premtuar të zbatojë për mallrat e huaja të shitura në Shtetet e Bashkuara.
Kujtojmë se Trump ftoi bizneset e huaja të hapin dyqane në vendin e tij gjatë një paraqitje virtuale në Forumin Ekonomik Botëror në Davos, Zvicër, javën e kaluar.
“Mesazhi im për çdo biznes në botë është shumë i thjeshtë: Ejani të bëni produktin tuaj në Amerikë dhe ne do t’ju japim taksat më të ulëta të çdo kombi në tokë”, tha Trump. “Nëse nuk e prodhoni produktin tuaj në Amerikë, që është prerogativa juaj, do t’ju duhet të paguani një tarifë”.
