Presidenti amerikan Donald Trump e ka quajtur deficitin prej 300 miliardë eurosh të Bashkimit Evropian me SHBA-në si një “mizori”, duke shtuar se tarifat “do të ndodhin patjetër” me Bashkimin Evropian dhe ndoshta edhe me Mbretërinë e Bashkuar.
Megjithatë, ai tha se situata me Mbretërinë e Bashkuar “mund të zgjidhet”, duke shtuar se kryeministri Keir Starmer dhe ai “po shkojnë shumë mirë”, shkruajnë mediat e huaja, përcjell Telegrafi.
Komentet e Trump mund të tendosin më tej marrëdhëniet midis BE-së dhe Mbretërisë së Bashkuar pasi kryeministri britanik kërkon të rivendosë marrëdhëniet e saj me bllokun.
Kujtojmë se Starmer do të vizitojë Brukselin të hënën.
Dhe duke folur para komenteve të Trump dhe një ditë përpara takimit me liderët e BE-së në Bruksel, Keir Starmer tha se do të kërkonte një marrëdhënie të fortë tregtare me SHBA-në.
Ndërsa duke folur me gazetarët në bazën e përbashkët Andrews në Maryland të dielën, Trump tha se “Shtetet e Bashkuara janë ‘grabitur’ nga pothuajse çdo vend në botë”.
Të shtunën, ai kishte nënshkruar një urdhër për të vendosur tarifa të ashpra për importet nga Meksika, Kanadaja dhe Kina.
Trump shtoi se ai ka pasur një fundjavë të zënë duke u marrë me Ukrainën dhe Rusinë dhe ka zhvilluar diskutime me Izraelin përpara vizitës së kryeministrit Benjamin Netanyahu në SHBA.
Masat tregtare që Trump nënshkroi të shtunën në vendpushimin e tij në Florida shkaktuan një përzierje paniku, zemërimi dhe pasigurie dhe kërcënuan të prishin një partneritet të vjetër dekadash në tregtisë në Amerikën e Veriut, ndërsa tensionojnë më tej marrëdhëniet me Kinën.
