Përmbytjet në Australi kanë shkaktuar shkatërrime “të pabesueshme” në komunitetet në të gjithë Queensland-in verior, ka thënë kryeministri i shtetit, edhe pse kushtet po lehtësohen më shpejt se sa ishte parashikuar.
Mijëra banorë të evakuuar filluan të kthehen në shtëpitë e tyre të martën, por dyshohet se qindra prona dhe biznese janë përmbytur. Një grua ka vdekur, transmeton Telegrafi.
“Është një fatkeqësi që do të testojë vendosmërinë e njerëzve,” tha për ABC kryeministri i Queensland, David Crisafulli.
Pjesë të rajonit janë goditur nga gati 2 metra shi që nga e shtuna, duke shkaktuar paralajmërime të vazhdueshme për përmbytje dhe ndërprerje të energjisë elektrike – por kryeministri tha se kushtet e motit kanë qenë “vërtet të mira” në orët e fundit.
Banorja Jo Berry tha për BBC se ajo dhe familja e saj ishin mes atyre që u kthyen në shtëpi të martën, pasi kaluan një natë pa gjumë duke monitoruar reshjet.
“Njerëzit flasin për PTSD kur bie shi këtu dhe unë e kuptoj plotësisht,” tha Berry, dikur nga Leicester në Mbretërinë e Bashkuar.
“Ne kemi qenë në shtëpi këtu për më shumë se 20 vjet dhe kemi kaluar nëpër disa ngjarje ciklonesh dhe përmbytje të vitit 2019, kështu që nuk është rodeoja jonë e parë”, shtoi ajo, duke iu referuar një katastrofe nga përmbytjet që shkaktoi 1.24 miliardë dollarë dëme.
