Një avion ushtarak me shtetas indianë të akuzuar se kishin hyrë në mënyrë të paligjshme në SHBA, arriti në Punjab, në veri të Indisë, të mërkurën. Ky ishte fluturimi i parë i tillë në Indi që kur administrata e Presidentit Trump nisi goditjen ndaj emigrantëve pa dokumente.
Sipas raportimeve të mediave, avioni ushtarak, i cili u ul nën masa të rrepta sigurie, mbante 104 të dëbuar. Autoritetet nuk e konfirmuan numrin, por thanë se të dëbuarit do të priten në mënyrë miqësore.
Nju Delhi, i cili nuk dëshiron ta kthejë emigracionin e paligjshëm në një çështje të debatueshme me Uashingtonin, ka thënë se është i hapur për kthimin e indianëve pa dokumente nga Shtetet e Bashkuara, nëse verifikohet kombësia e tyre.
Presidenti Donald Trump tha javën e kaluar se kryeministri indian Narendra Modi e kishte siguruar se vendi i tij do të “bënte atë që është e drejtë” për marrjen e emigrantëve e paligjshëm. Presidenti e bëri deklaratën pas një bisede telefonike me kryeministrin Modi.
Në Nju Delhi, zëdhënësi i ministrisë së Jashtme Randhir Jaiswal tha në një konferencë për shtypin të premten se India dhe Shtetet e Bashkuara janë të angazhuara në një proces për frenimim e emigracionit të paligjshëm dhe “se bashkëpunimi në këtë fushë mes Indisë dhe SHBA-së është i fortë dhe efektiv. Kjo do të jetë e dukshme në periudhën në vijim”, tha ai.
Në një takim që mund të mbahet javën e ardhshme mes zotit Trump dhe zotit Modi, tregtia dhe emigracioni janë ndër çështjet kryesore që pritet të bisedohen.
“India nuk dëshiron të fokusohet në çështjen e dëbimit të emigrantëve të paligjshëm. Interesi i qeverisë është të sigurojë që kanalet e emigracionit të ligjshëm në SHBA për shtetasit indianë të mos kufizohen nga administrata Trump,” thotë Manoj Joshi, bashkëpunëtor në Fondacionin Kërkimor Observer në Nju Delhi.
Këto rrugë ligjore janë vizat H-1B për punëtorët e kualifikuar dhe vizat për studentët.
“Të dyja palët janë të angazhuara për të penguar emigracionin e paligjshëm, duke krijuar gjithashtu më shumë mundësi për emigracionin e ligjshëm të qytetarëve indianë në SHBA”, është shprehur zëdhënësi i ministrisë së Jashtme Randhir Jaiswal.
Numri i emigrantëve indianë që përpiqen të hyjnë në mënyrë të paligjshme në SHBA është rritur vitet e fundit. India zë vendin më të madh të emigrantëve të paligjshëm në Shtetet e Bashkuara nga vendet aziatike, sipas të dhënave të Doganave dhe Mbrojtjes së Kufirit të Shteteve të Bashkuara.
Megjithatë, numri i tyre i përgjithshëm është ende i vogël. Indianët përbëjnë vetëm rreth 3 për qind të kalimeve të paligjshme.
Shtetet e Bashkuara kanë identifikuar rreth 18,000 emigrantë indianë pa dokumente që do të kthehen në shtëpi, sipas një raporti të agjencisë Bloomberg javën e kaluar.
