Edhe dy ditë kanë mbetur deri në përmbylljen e festivalit të librit “BookFest” në Gjilan, i organizuar nga Latif Mustafa.
Ky festival, i cili ka nisur nga Prizreni dhe më pas ka vazhduar në Prishtinë, tashmë ka bërë ndalesën e tij edhe në Gjilan, duke sjellë mbi 2500 tituj librash dhe aktivitete të shumta për fëmijët, si lojëra edukative, kuize, vizatime dhe ushtrime që stimulojnë mendimin kritik, kreativ dhe logjik.
Sipas organizatorit Latif Mustafa, një nga veçoritë kryesore të festivalit janë zbritjet e mëdha në libra, të cilat ofrohen në “BookFest”.
“Gjilani ka një numër të madh lexuesish, shumë prej të cilëve bëjnë porosi online. Kjo na ka shtyrë të mendojmë për hapjen e një librarie në qytet. Gjilani është një qendër lidhëse mes Luginës, një pjese të Ferizajt dhe Karadakut, dhe padyshim që ka nxjerrë figura të rëndësishme,” tha Mustafa.
“Më habiti fakti se çfarë librash kërkojnë të lexojnë të rinjtë gjilanas. Ata janë shumë kreativë dhe me iniciativë,” u shpreh ai për Radio Kosova.
Mustafa shtoi se ndonëse në Gjilan ekzistojnë disa librari të vogla, qyteti mund të përfitojë nga një hapësirë më e madhe dedikuar librit dhe kulturës së leximit.
Në krahasim me vitin e kaluar, organizatorët synojnë ta shtrijnë festivalin në më shumë qytete të Kosovës.
“Synimi ynë është që libri të bëhet pjesë e hapësirës publike, duke i sjellë lexuesit më pranë tij, pa qenë e nevojshme të shkojnë në librari,” përfundoi Mustafa.
