Drejtoria Rumune për Hetimin e Krimit të Organizuar dhe Terrorizmit (DIICOT) thuhet se ka paraqitur një kallëzim penal kundër aktorit belg, Jean-Claude Van Damme.
Sipas degës së CNN, ”Antena 3”, aktori 64-vjeçar, i njohur më së shumti për rolet e tij në filmat ”Kickboxer”, ”Double Impact” dhe ”Street Fighter”, thuhet se po përballet me veprime ligjore në Rumani për marrëdhënie seksuale të vullnetshme me disa gra që ishin viktima të trafikimit seksual.
Aktori dyshohet se u takua me disa persona gjithashtu nën hetim për krime të trafikimit seksual, të cilët i ofruan atij të bënte seks me pesë modele rumune si “dhuratë”.
Një nga këta persona besohet të jetë biznesmeni rumun dhe pronari i agjencisë së modelimit, Morel Bolea.
Ky incident i supozuar thuhet se ka ndodhur në Kanë dhe nuk është shënuar një afat kohor.
Adrian Cuculis, avokati i një prej viktimave të supozuara, deklaroi se “në një ngjarje të organizuar nga Jean-Claude Van Damme në Kanë, disa rumunë, të cilët aktualisht janë nën hetim për formimin e një grupi kriminal, dyshohet se i ofruan Jean-Claude Van Damme pesë gra rumune – fotomodele në Rumani – për seks”.
Ai shtoi se “personi që mori këto shërbime ishte në dijeni të gjendjes së tyre”.
Sipas Cuculis, incidenti që përfshin Jean-Claude Van Damme është pjesë e një hetimi më të madh të nisur në vitin 2020 nga zyra e prokurorit rumune për trafikimin e qenieve njerëzore dhe të miturve.
Duke marrë parasysh vendndodhjen e akteve të supozuara, Gjykata franceze e Kasacionit duhet të autorizojë fillimin e procedurës penale.
