Algjeria u ka kërkuar 12 zyrtarëve francezë që të largohen brenda 48 orëve, tha të hënën ministri i Jashtëm francez, duke shtuar se kjo ishte e lidhur me arrestimin e tre shtetasve algjerianë në Francë.
“Unë po u kërkoj autoriteteve algjeriane të heqin dorë nga këto masa dëbimi… nëse vendimi për të kthyer zyrtarët tanë mbetet, ne nuk do të kemi zgjidhje tjetër veçse të përgjigjemi menjëherë”, citohet të ketë thënë ministri i Jashtëm Jean-Noel Barrot.
Të 12-të përfshijnë disa anëtarë të ministrisë së brendshme franceze, tha një burim diplomatik për AFP.
Të premten, prokurorët francezë paditën tre algjerianë, duke përfshirë një zyrtar konsullor, me dyshimin e përfshirjes në rrëmbimin e një influencuesi algjerian, Amir Boukhors, në një periferi të Parisit në prill 2024.
Boukhors, i njohur si “Amir DZ”, është një kundërshtar i qeverisë algjeriane dhe ka më shumë se një milion ndjekës në TikTok.
Ai ka qenë në Francë që nga viti 2016 dhe iu dha azil politik në vitin 2023. Ai u rrëmbye në prill 2024 dhe u lirua të nesërmen, sipas avokatit të tij.
Algjeri po kërkon kthimin e tij për t’u përballur me gjyqin, pasi ka lëshuar nëntë urdhër-arreste ndërkombëtare kundër tij, duke e akuzuar atë për mashtrim dhe vepra terrori.
