Shkup, 18 maj – Njëri nga themeluesit dhe anëtari i Kryesisë Qendrore të ASH-së, Latif Arif në një status në rrjetin social facebook ka komentuar lëvizjet e fundit në ASH.
Sipas tij zhvillimet e fundit në Aleancën për Shqiptarët nuk janë goditje ndaj askujt. Por janë mbrotje, dhe janë reagime për të ruajtur vijën, frymën dhe qëllimin për të cilin u themelua kjo Aleancë, një Aleancë që nuk është prone e askujt, por një mision kolektiv për shqiptarët, transmeton Zhurnal.mk
“Së pari, dua ta bëj të qartë se veprimet tona, fjalët tona, dhe qëndrimet që kemi marrë këto ditë nuk janë as sulm, as goditje ndaj askujt. Ato janë mbrojtje. Janë reagim i drejtëpërdrejtë për të ruajtur vijën, frymën dhe qëllimin për të cilin u themelua kjo Aleancë, një Aleancë që nuk është prone e askujt, por një mision kolektiv për shqiptarët.
Po, ne kemi folur. Sepse nuk jemi mësuar të heshtim kur dikush mundohet t’i ngulë thikën pas shpine asaj që së bashku kemi ndërtuar. Ditën dërgojnë zemra, buzëqeshje dhe fjalë të bukura, por natën fshehurazi vënë në pikëpyetje çdo parim që e ka bërë këtë lëvizje të fortë dhe të ndershme. Ndaj nuk do të qëndrojmë indiferentë. Heshtja do të ishte tradhti ndaj atyre që kanë sakrifikuar për Aleancën, ndaj çdo të riu që ende beson se ndryshimi është i mundur.
Ne që sot akuzohemi për “goditje”, kemi qenë po ne që e kemi mbrojtur këtë Aleancë dje, e mbrojmë sot dhe do ta mbrojmë gjithmonë edhe kur është dashur të flijojmë, edhe kur kemi mbetur vetëm në vijën e parë. Ndërsa disa që sot flasin për “goditje të ulëta”, në ato momente kanë zgjedhur të jenë larg , duke heshtur, shmangur përgjegjësinë apo duke vëzhguar nga distanca, në vend se të qëndronin krah nesh.
Ne nuk kemi frikë nga stuhitë. Ne nuk jemi këtu për poste, por për përgjegjësi. Dhe përgjegjësia jonë është të mos lejojmë që Aleanca për Shqiptarët të kthehet në një mjet për interesa personale, në një skenë për aktorë të vjetër që kujtojnë se mund të rikthehen pa asnjë reflektim.
Jetën nuk e matim me poste politike, por me qëndrime. Dhe po, llogaritë nuk mbyllen me heshtje, por as nuk hapen me shantazhe morale.
Kujt i dhemb transparenca, ndoshta duhet të shikojë brenda vetes, jo të gjuajë me gurë ata që kanë mbrojtur shtëpinë e përbashkët. Ne nuk kemi ardhur të shkatërrojmë, por të ruajmë atë që bashkë kemi ndërtuar me shumë mund. Dhe do ta ruajmë me çdo çmim.”, shkruan Arifi
