Shtetet e Bashkuara thuhet se kanë ripozicionuar armë bërthamore taktike në Mbretërinë e Bashkuar për herë të parë në më shumë se 15 vjet, duke shënuar një ndryshim të mundshëm në qëndrimin bërthamor të NATO-s në Evropë.
Armët besohet të jenë bomba gravitacionale termonukleare B61-12, të transferuara në bazwn e forcave ajrore mbretërore Lakenheath në Suffolk, Angli, transmeton Telegrafi.
Bombat u dërguan nga Qendra e Armëve Bërthamore e Forcave Ajrore të SHBA-së në bazën ajrore Kirtland në New Mexico dhe u dorëzuan në një strukturë të sigurt magazinimi të ndërtuar rishtazi në vendin e Mbretërisë së Bashkuar, sipas UK Defence Journal.
Ndërsa Departamenti i Mbrojtjes i SHBA-së nuk e ka konfirmuar zyrtarisht lëvizjen, dhe Ministria e Mbrojtjes e Mbretërisë së Bashkuar nuk komenton mbi vendosjet bërthamore, burime të shumta kanë treguar mbërritjen e armëve.
B61-12 është një bombë bërthamore taktike e modernizuar me rendiment të ndryshueshëm dhe aftësi udhëzimi precize. Është e pajtueshme me disa platforma shpërndarjeje, duke përfshirë F-35A Lightning II e forcave ajrore mbretërore në Lakenheath, shtëpia e Skuadroneve të 493-ta dhe 495-ta, që operon F-35A dhe ishte ndër bazat e para evropiane që e bëri këtë.
Lakenheath priti për herë të fundit armë bërthamore amerikane gjatë Luftës së Ftohtë, me heqjen përfundimtare të raportuar në vitin 2008 mes përpjekjeve më të gjera për çarmatim në të gjithë Evropën.
Kthimi i aftësive bërthamore në bazë vjen pas përmirësimeve të infrastrukturës të vërejtura për herë të parë në dokumentet e buxhetit të SHBA-së për vitin 2022, të cilat i referoheshin projekteve të ndërtimit në përputhje me kërkesat e misionit bërthamor.
Zyrtarët nga qeveritë e SHBA-së dhe Mbretërisë së Bashkuar nuk kanë komentuar mbi ripozicionimin e raportuar.
Më parë, figura mediatike e lidhur me Kremlinin, Margarita Simonyan, paralajmëroi se planet e SHBA-së për të furnizuar Ukrainën me raketa me rreze të gjatë veprimi mund ta detyrojnë Rusinë të lëshojë një “ultimatum bërthamor”, duke pretenduar se asnjë rezultat tjetër nuk ishte i mundur.
Deklarata e saj, e cila u pasqyrua nga media shtetërore dhe blogerët pro-luftës, pasoi raportimet se presidenti Donald Trump së shpejti mund të miratojë armë të afta për të goditur thellë në territorin rus.
