Duke ndjekur shembullin e vendeve të rajonit, nëpër rrjetet sociale qytetarët kanë nisur iniciativa për bojkotimin e marketeve të premten, më 31 janar, shkruan Alsat.
Sipas kësaj nisme që ka marrë hov nëpër rrjetet sociale, bojkotimi i marketeve bëhet për shkak të çmimeve tepër të larta të produkteve ushqimore.
Organizatorët e këtij bojkoti u bëjnë thirrje qytetarëve që të mos blejnë dhe të mos përdorin shërbimet e marketeve ditën e premte, për të dërguar mesazh të qartë për përgjegjësit e kësaj situate ekonomike.
“Ne bëjmë thirrje për bojkot masiv të premten. Shmangni blerjet në supermarkete, shmangni tregjet më të vogla. Duam të dërgojmë mesazh që qytetarët nuk do t’i tolerojnë këto rritje joreale të çmimeve”, thuhet në nismë.
Disa qytetarë thonë se janë të gatshëm që t’i bashkohen kësaj nisme dhe të premten të bojkotojnë blerjen në markete ndërsa disa tjerë mendojnë se kjo nuk do të ndikojë e as qytetarët nuk do të durojnë të mos shkojnë në dyqan të blejnë diçka.
“Ka thirrje për bojkot të marketeve të premten për shkak të çmimeve, a e përkrahni? Perse të mos e përkrah, shumë punë e mençur”, tha një qytetare.
“Po duhet të ulen çmimet. A e përkrahni bojkotin e marketeve që po shpërndahet në rrjetet sociale? Po. Le të ulen çmimet sepse qytetarët nuk kanë aq para”, u shpreh një qytetare tjetër.
“Çmimet ndryshojnë që të mos mundemi t’i kontrollojmë, aspak nuk mund t’i kontrollojmë çmimet. A do ta përkrahni bojkotin të premten? Nuk e di”, theksoi një qytetare.
“I ke parë videot në Kroaci? Po i pashë që kanë bojkotuar dhe ka sukses por tek ne mendoj se nuk do të ketë sukses. As nuk do të ndikoj e as qytetarët nuk do të durojnë dhe të mos shkojnë në dyqan të blejnë diçka. Por përsëri çmimet janë të larta? Po, gjithçka është shtrenjtuar”, u shpreh një qytetar.
Përveç qytetarëve, edhe Organizata e Konsumatorëve të Maqedonisë e mbështet bojkotin e paralajmëruar të supermarketeve ku thonë se nuk janë organizatorë të këtij aksioni, por përkrahim qytetarët për të inkurajuar sektorin e biznesit që të ulë çmimet e produkteve, veçanërisht të produkteve ushqimore sepse janë vërtet të shtrenjta.
Kjo nismë filloi në vendet e rajonit si në Kroaci, më 24 janar u bojkotuan dyqanet, rrjetet e shitjes me pakicë dhe pikave të karburantit për shkak të rritjes së vazhdueshme të çmimeve. Thirrja për bojkot të ri vazhdon akoma ndërkohë në rrjetet sociale shpërndahen video të dyqaneve që kanë ulur çmimet pas bojkotit.
