Krahu i armatosur i Hamasit, Brigadat Al-Qassam, kanë filluar përgatitjet për shkëmbimin e gjashtë të burgosurve me Izraelin në kuadër të fazës së parë të marrëveshjes së armëpushimit që hyri në fuqi më 19 janar.
Sipas një korrespondenti të Anadolu, anëtarët e brigadës janë vendosur në Khan Younis në Rripin e Gazës jugore në përgatitje për dorëzimin e pengjeve izraelitë te Komiteti i Kryqit të Kuq Ndërkombëtar.
Grupi i rezistencës palestineze ngriti pankarta që refuzonin planet e zhvendosjes të propozuara nga presidenti i SHBA-së, Donald Trump.
Dje, Al-Qassam njoftoi emrat e tre pengjeve izraelite që do të lirohen sot në kuadër të marrëveshjes, përkatësisht Alexander (Sasha) Turbanov, Sagui Dekel-Chen dhe Yair Horn.
Grupi i rezistencës palestineze publikoi gjithashtu emrat e 369 të burgosurve palestinezë, të cilët pritet të lirohen në këmbim të pengjeve izraelite.
Në pesë shkëmbimet e fundit, Hamasi liroi 16 izraelitë në këmbim të 766 palestinezëve të liruar nga burgjet izraelite, duke përfshirë gra dhe fëmijë.
Më 19 janar, marrëveshja e armëpushimit hyri në fuqi në Gaza, duke ndalur luftën gjenocidale të Izraelit që ka vrarë të paktën 48.200 palestinezë, shumica prej tyre gra dhe fëmijë, si dhe e ka lënë enklavën në gërmadha.
Nëntorin e kaluar, Gjykata Penale Ndërkombëtare lëshoi urdhër-arreste ndaj kryeministrit izraelit, Benjamin Netanyahu dhe ish-ministrit të Mbrojtjes, Yoav Gallant, duke i akuzuar për krime lufte dhe krime kundër njerëzimit në Gaza.
Izraeli për luftën në enklavën palestineze gjithashtu përballet me një çështje gjenocidi në Gjykatën Ndërkombëtare të Drejtësisë.
